भांगरभूंय | प्रतिनिधी
भांगरभूंय । प्रतिनिधी
पणजीः ताळगांव हागच्या सर्वे नंबर 276/6 तलो फोडल्लो दोंगोर पयलीं भशेन करपा खातीर 4 मार्य मेरेन आनीक 35 लाख रुपया जमा करचे आनी तो मेरेन प्रतिवादी एस्टोनियो आल्मेदा हाच्या नांवार आशिल्ली बीएमडब्ल्यू आनी रेंज रोव्हर ह्यो गाडयो ताच्या घरा भायर व्हरपाक बंदी घालपाचो आदेस मुंबय उच्च न्यायालयाच्या गोंय खंडपिठान दिला. फुडली सुनावणी 5 मार्चाक जातली.
पणजेचो आदलो म्हापौर टोनी रॉड्रिग्ज हाणे ह्या संबंदी याचिका सादर करून राज्य सरकार, मुख्य नगर नियोजक,एनजीपीडीए, उत्तर गोंय जिल्होधिकारी आनी एस्टोनियो आल्मेदा हांका प्रतिवादी केल्यात. दोंगोर फोडला ताची पळोवणी करपाक खंडपिठान एनजीपीडीएक सांगल्लें. दोगराचेर अतिक्रमण केल्ल्याचे दिसून आयल्या उपरांत एनजीपीडीएन आल्मेदा हाका 1 लाख रुपयाचो दंड भरपाक सागून स म्हयन्यांत दोंगोर पयलीं भशेन करपाचो आदेश दिल्लो. दोगोंर पयलीं भशेन करपा संबंदी प्रतिज्ञापत्र सादर करून लेगीत आल्मेदा हाणे चडशें कांय केलें ना हे खातीर न्यायालयान ताका पयलीं 10 लाख उपरांत आनीक 15 लाख न्यायालयांत जमा करपाक सांगल्ले.
आल्मेदा परत परत मुजत वाडोवन दिवपाची मागणी करता म्हणून न्यायालयान एनजीपीडीएक दोंगोर पयलीं भशेन करपाक कितलो खर्च येतलो हाची पळोवणी करून म्हायती दिवपाक सांगल्लें. 60 लाख रुपया खर्च येतलो अशे तांणी सांगल्ल्यान न्यायालयान आल्मेदा हाका 4 मार्च मेरेन आनीक 35 लाख रुपया जमा करपाक सांगलां. तो मेरन ताच्या गाडयो घरा भायर व्हरपाक बंदी घालपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
