ताळगांवची शाळा दुरुस्तीकामा खातीर बंद

भांगरभूंय | प्रतिनिधी

कोफुसांवा उपरांत काजा दो पोव्हो इमारतींत घेतले वर्ग

भांगरभूंय । प्रतिनिधी

पणजीः आयज गोंयभर शाळा सुरू जाल्यो, पूण ताळगांवां विद्यार्थ्यांक आगळे तरेन येवकार दिलो. ताळगांवां इगर्जे लागसार आशिल्ली मुळावी सरकारी शाळेचें काम सुरू आशिल्ल्यान ती बंद आसली, ताका लागून पालकां मदीं कोफुसांव जालें. उपरांत हे शाळेचे वर्ग ताळगांव पंचायतीच्या काजा दो पोव्हो हे पोरणे इमारतींत घेतले.

ताळगांवची पुर्तुगेज तेंपा वयले मुळावी सरकारी शाळेचें दुरुस्तीकाम हातांत घेतिल्लें. पूण हें काम वेळा भितर पुराय जावंक ना. ते खातीर पालकांक अजब प्रकार पळोवपाक मेळ्ळो. पालकांक शाळेचे दुरूस्ती विशीं पयलीं कसलीच कल्पना दिवंक नाशिल्ली. ताका लागून बुधवार सावन शाळा सुरू जाल्या असो समज दवरून पालक आपल्या भुरग्यांक घेवन शाळेंत गेले आनी पळयल्यार शाळेचें पाखें उक्तें, दारां मोडिल्ली आसलीं.

ही शाळा चालू करतले काय भुरग्यांक सुट्टी दितले असो प्रस्न पालकांच्या मनांत तयार जालो. उपरांत बोवाळ जातकत अधिकाऱ्यांनी हे शाळेचे वर्ग कुशीच्या काजा दो पोव्हो इमारतींत हालयले. जे मेरेन हे शाळेचें काम चलता ते मेरेन हे वर्ग काजा दो पोव्हो भितर चलतले. मजगतीं, शाळेच्या दुरूस्तीकामांक बरोच नेट आयला आनी दोन दिसां भितर हें काम पुराय जावपाची आस्त आसा.

ह्या घाळपणाचेर तिडक उक्तायतना थळावी सेसील रॉड्रिग्स हांणी सांगलें, हे शाळेचें दुरूस्तीकाम चालू आसतना भौशीक बांदकाम खात्यान पर्यायी शाळेची वेवस्था करपाक जाय आसली, पूण तशें जावंक ना. ह्या विद्यार्थ्यांक ताळगांव पंचायतीचे पोरणे इमारतींत काजा दो पोव्हो भितर हालयले. जेन्ना भुरग्यांची शाळा सुरू जाली तेन्ना रस्त्यार पडिल्ली फोंडकुलां पुरोवपाचें काम हातांत घेतले. हें काम 3-4 दिसां पयलीं करपाक जाय आसलें. रस्त्याची परिस्थिती आनी कांसवां गतीन चलपी दुरुस्तीकामा विशीं आपणे हे आदीं आवाज काडिल्लो, अशें सेसील हांणी सांगलें. ह्या कामाचें कसलेंच नियोजन ना आनी कामाची पद्दत लेगीत सारकी ना. ह्या दुरुस्तीकामाक आदींच कळाव जाल्ल्यान बोवाळ तयार जाला. नळे काडून वयर पत्रे बसयल्यात आनी गिमांत गरमी वाडून भुरग्यांक उबाळ्याचो खूब त्रास जातलो. गोंयच्या शिक्षण मंत्र्यान परतून एक फावट गोंयकारांक बेजार केल्यात, असो आरोप सेसील हांणी केलो.