भांगरभूंय | प्रतिनिधी
पणजी : राज्यांत येत्या १ मार्च २०२५ सावन येरादारी नेम मोडल्यार संबंधितांक घाल्ल्या तालांवाचे पयशे फकत डिजिटल पेमेंट पद्धतीचो वापर करून भरचे पडटले. हाचे पयलीं कांय कडेन पुलीसाक पयशे दिताले, मागीर तो रिसीट दितालो. ते पयशे कॅश भरपाक मेळचे ना. हे विशीं येरादारी पुलीस उपअधीक्षक सुदेश नार्वेंकार हांणी हालींच आदेश जारी केला.
आदेशांत म्हणिल्ले प्रमाण, डिजिटल पेमेंटाक उर्बा दिवपा खातीर तशेंच तालांव भरप सोंपें जावेचं हे खातीर हो निर्णय घेतला. डिजिटल पेमेंट हे डेबीट/ क्रेडीट कार्ड, ई चलन यंत्रां वेल्या क्यूआर कोड वा केंद्रीय येरादारी खात्याचे वेबसायटी वेल्यान भरपाक शकतात.
मेळिल्ले म्हायती प्रमाण, कांय दिसां आनीं दिवचल पुलीस स्टेशनांत जमा जल्ल्या तालांवाच्या कॅश पयशांनी घोटाळो जाल्लो. एके बायल पुलीस कर्मचार्यान सुमार १७.३० लाख रुपयांचो घोटाळो केल्ल्याचो आरोप जाल्लो. तिणें ते पयशे बँकेंत भरूंक नाशिल्ल्याचें उक्तडार आयिल्लें. उपरांत ते बायलेक निलंबीत केल्ली. अशे प्रकार परत घडचे न्हय हे खातीर डिजिटल पेमेंट करपा विशीं विचार सुरू आशिल्लो. सरकारान योग्य निर्णय घेतला आसलो तरी थोडे गाडी चलोवपी शंबराची नोट दिवन तालांव टाळपाचो यत्न करतले, अशें एका तरणाट्यान ह्या प्रतिनिधी कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
