भांगरभूंय | प्रतिनिधी
गोंयची अर्थवेवस्था मिनाच्या वेवसायाचेर निंबून आशिल्ली. फाटलें दशक मायज तो बंद आशिल्ल्यान आतां पर्यटन वेवसायाचेर आदन दवरचें पडटा. हांगां कांयच शिजलें ना, जाल्यार कांयच ताळ्यांत पडचें ना. पूण हालीं चुलींतलीं पेटपी लाकडांच भायर काडपाचें काम येरादारी पुलीस करतात असो आरोप सत्ताधारी पक्षांतलेच आमदार करपाक लागल्यात.
पर्यटक गोंयांत येतकच हांगच्यो रॅन्ट बायक वा व्हडल्यो गाडयो भाड्याक घेतात. ताची नंबर प्लेट हळडुवी आसता म्हणटकच खंयच्याय कोनशाक उबो रावपी येरादारी पुलीस तांकां ज्युस्त वळखता आनी आडायता. हालींच गोंयचे शिमेचेर असोच एकच प्रकार घडिल्लो. भायल्या राज्यांतल्यान गाडी घेवन गोंयांत आयिल्ल्या एका तरणाट्याक पुलिसांनी आडायलो आनी तांचे मदीं कांय कारणावयल्यान वाद जालो. तेन्ना ह्या तरणाट्यान गोंय पुलिसांचेर आरोप करीत तांची अब्रू वयर काडली. आपल्याक न्यायालयांत लेगीत वचपाक पडल्यार कोताक येता पूण आपूण तालांव भरचो ना अशी भुमिका ताणें त्या वेळार घेतली. ताचो हो व्हिडियो बरोच वायरल जाल्लो. हातूंतल्यान त्या तरणाट्याचें कांयच वायट जालें ना, वयल्यान गोंयचें लुकसाण जालें. पुलीस पयशे घेतात असो सर्रास आरोप जाता, हे खातीर बऱ्या पुलिसांक लेगीत ‘बरे’ अशें म्हणटना कोणाचीय जीब जड जावपाची.
सत्तेंतल्याय आमदारांकय हेंच म्हुणपाचें आसा. मात ते वेगळ्या उतरांनी उलोवन आपलो राग उक्तायतात. हे आदीं गोंयचे महसूल मंत्री आतानासियो मोंसेरात आनी पर्यटन मंत्री रोहन खंवटे हांणीय येरादारी पुलिसां कडल्यान पर्यटकांक त्रास जाता असो आरोप केल्लो. तशेंच कळंगुटेचे भाजपा आमदार मायकल लोबो हांणीय कितलेशेच फावट हे विशीं उलयलां. तांणी फाटल्या सप्तकांत परत होच मुद्दो काडलो आनी पर्यटकांक जावपी हे त्रास वरिश्ट पुलिसांनी सोंपोवचे अशी मागणी केल्या. आतां तर साळगांवचे आमदार केदार नायक हांणीय तांच्या सुरांत सूर मेळयला आनी पर्यटकांक येरादारी पुलिसां कडल्यान जावपी त्रास पयस जावंक जाय अशें म्हणलां.
ज्या पर्यटकांक पुलिसां कडल्यान त्रास जातात, तो आपल्या राज्यांत वतकच गोंयचो अपप्रचार करतलो आनी ते खातीर थंयचे लोक हांगां येवंक पसंत करचे नात असो हुस्को ह्या आमदारांनी उक्तावन दाखयला.
हालींच येरादारी पुलिसांच्या शर्टाक कॅमेरा लायिल्ल्याची बातमी वाचपाक मेळ्ळी. म्हुणल्यार कोणाकूय आडयतकच ह्या कॅमेरांत सगळें कितें बंदिस्त जातलें. फकत पर्यटकांक त्रास करतात तेन्ना तांणी आपली कॅमेराची दिशा दुसरे कडेन करिना जाल्यार पुरो!! आनी तो आवाज रेकॉर्ड करून घेता जाल्यार ‘टेबला पोंदचें’ अमूक सुवातेर दवर म्हूण ‘सिनाल’ करिना जाल्यार पुरो. ‘टेबला पोंदच्यान’ कोण घेनात अशें सांगपाचें धाडस गोंयचो एक तरी पुलीस करपाक शकता? शक्यच ना!!
मायकलबाबा लोबो म्हुणटा तातूंत तथ्य आसा. पर्यटकांनी खरेंच कायदो मोडलो जाल्यार तांकां तालांव दिवंकच जाय. पूण सात-सात फावटी आडावन तांकां त्रास दिवप समा न्हय. राज्यांत अपघातांचो आंकडो वाडत आशिल्ल्यान लोबो हांणी हुस्को उक्तायलो आनी अपघात प्रवण वाठारांत उपाय येवजण करपाची गरज उक्तायली.
घाळपणान गाडी चलोवप, तशेंच येरादारी सायनेज बोर्ड, रंगोवंक नाशिल्ले स्पीड ब्रेकर आनी इबाडिल्ल्या रस्त्यां खातीर अपघात जायत आसात असो हुस्कोय तांणी हे आदीं उक्तायला.
हालीं राज्यांत अपघात वाडल्यात. तातूंत पर्यटक सोरो बी पिवून अपघात करपाचोय आस्पाव आसा. अशा पर्यटकांचेर कारवाय जावंकच जाय. कित्याक तर ते मजा करतना नशेंत रावून दुसऱ्यांचो जीव घेतात. पूण जे प्रामाणिकपणान आपले फामिले वांगडा गोंय भोंवपाक येतात, तांकां पणजेच्यान कळंगुटे पावता म्हणसर ६ फावटी आडावन ‘पयशे’ घेतले जाल्यार आमच्या गोंयांत कोण येतलो? आनी आमी जेन्ना भायल्या राज्यांत वतात तेन्ना आमकांय थंयच्या पुलिसांनी अशें केल्यार बरें दिसत?
समीर नायक
मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
