भांगरभूंय | प्रतिनिधी
फाटलीं 12 वर्सां हो रस्तो डांबर घालपाची पळयतालो वाट
म्हापशें: शारांतल्या मुखेल रस्त्यां मदलो एक आशिल्लो तार पूल ते टॅक्सी स्टॅण्ड ह्या फोंडकुलांनी भरिल्ल्या रस्त्याच्या हॉटमिक्सिंगेचें काम हातांत घेतलें. फाटलीं 12 वर्सां हो रस्तो डांबर घालपाची वाट पळयतालो.
काल (मंगळारा) सांजवेळा उपसभापती ज्योशुआ डिसोझा हांचे हाजिरेंत ह्या रस्त्याच्या हॉटमिक्सिंगेच्या कामाचो शुभारंभ केलो. ह्या वेळार नगराध्यक्षा प्रिया मिशाळ, थळावे नगरसेवक प्रकाश भिवशेट, नगरसेवक सुशांत हरमलकार, साईनाथ रावत, नगरसेविका बार्बरा कारास्को, भौशीक बांदकाम खात्याचे अधिकारी, कंत्राटदार आनी थळावे लोक हाजीर आशिल्ले.
उपसभापती ज्योशुआ डिसोझान म्हणलें, ह्या कामा खातीर 1.12 कोटी रुपया खर्च जातलो. तार पूल ते टॅक्सी स्टॅण्ड मेरेनचो रस्तो पेड्डेर जावन खूब वायट स्थितींत आशिल्लो. हो रस्तो योग्य पद्दतीन हॉटमिक्स करून रस्त्याची उंचाय आनी सपाटीकरण राखतले, अशें आस्वासन कंत्राटदार मोंतेरो हांणी दिलां. हें काम फुडल्या चार दिसांत पुराय जातलें. ह्या रस्त्याक लागून म्हापशें तशेंच बस्तोडकारांनी खूब त्रास सोंसले. लोकांनी संयम बाळगिल्ले खातीर तांचो हांव उपकारी आसा.
नगरसेवक प्रकाश भिवशेट हांणी म्हणलें, भुंयगत रस्त्यांच्या कामाक लागून लोकांक खूब त्रास सोंसचो पडलो. लोकांच्यो सेगीत कागाळी आनी प्रसार माध्यमांनी ह्या रस्त्याचो विशय लावन धरिल्लो. निमाणें हो रस्तो हॉटमिक्स जायत आशिल्ल्यान आमदार आनी नगराध्यक्षांनी घेतिल्ल्या फुडारा खातीर तांचो हांव उपकारी आसां.
नगराध्यक्षा प्रिया मिशाळ हांणी आपलें मनोगत उक्तायतना आमदारान दिल्ल्या सहकार्या खातीर तांचे उपकार मानले. रस्तो जावपाक थोडो कळाव जालो. पूण प्रक्रियेक थोडो वेळ लागता. हवामानूय म्हत्वाची भुमिका वठयता अशें तांणी म्हणलें.
मजगतीं, मंगळारा खोर्ली वाठारांतल्या कांय भितरल्या रस्त्यांच्या डांबरीकरणाचें काम उपसभापती ज्योशुआ डिसोझा हांचे हस्तुकीं सुरू केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
