भांगरभूंय | प्रतिनिधी
न्हंयेंत माती, फातर, शिमिटाचे ब्लाॅक घालून तो जागो रस्तो रुंद करून वापरपाचे प्रकार खूब कडेन घडल्यात. न्हंयेचें उदक लोकवस्तींत येता वा दर्याचीं ल्हारां धडेक आपटून लागच्या इमारतींक धोको निर्माण जावं येता, म्हूण शिमिटाचे ब्लाॅक मांडून ल्हारां आडावपाचे यशस्वी यत्नूय जाल्यात. पूण हें उपाय सगलेच कडेन करप योग्य न्हय. जंय उदक सांठवता, तो जागो माती, फातर घालून भरल्यार पावसाच्या दिसांनी हुंवार येवंक शकता. मेळत थंय उदक तुंबून उरूंक शकता. लागसार घरां, आस्थापनां आसल्यार तांकां हें मारक थारूं येता. आतां तार- बस्तोड्यां न्हंयेंत माती, फातराचो भराव घालपी ट्रक पुलिसांनी जप्त केला.
तार न्हंय ही मुळांत चिखल आनी जलपर्णींक लागून आदले वरीं उरूंक ना. तिच्या अस्तित्वाकूच धोको निर्माण जाला. आतां हो मातयेचो भराव न्हंयेंत कित्याक घालताले तें कळना. थंय लागसारचो जागो सपाट केला. म्हणटकच थंय कसलो तरी वेवसाय येता आसतलो. न्हंये कुशीक कितेंय उबारपाक कायदो मनाय करता. म्हणटकच जर खरेंच थंय कितें उबें जाता जाल्यार तें कायदेशीर आसतलें. मातयेचो भराव न्हंयेंत घालून तीय जमीन घेवपाचो बी कोणाचो विचार आसा काय? बायपास, पूल बी उबारपाचो जालो काय सरकार अधिसुचोवणी दिवन जमीन कायदेशीर पद्दतीन हस्तांतरीत करता. तार न्हंये लागच्यान म्हामार्ग गेला, उदकाची पायपलायन गेल्या. म्हणटकच ती जमीन सरकारान हस्तांतरीत केल्याच आसतली. हो जागो बफर झोनांत पडना? मागीर थंय भराव घालप, लागीं धंदे, वेवसाय सुरू करप, कावला अड्डे घालप असले प्रकार कशे घडटात? पंचायतीक हें खबर आसा काय? कॅप्टन आॅफ पोर्ट, उदका पुरवण खातें, म्हामार्ग विभाग ह्या वाठाराक लागता आसतलोच. येणावळ विभाग ह्या न्हंय वाठाराचो राखणदार न्हय? हांगा वा हेर खंयूय संबंदीत सरकारी खातीं, थळावी पंचायत, पालिका हांचें लक्ष असल्या कामांचेर कशें आसना? तांणी तशे तकटे संबंदीत वाठारांनी लावपाक नाकात?
कोणूय उठ्ठा रस्त्या कुशीक दुकान सुरू करता, फळां विकता, फर्नीचर, मार्बलाचो व्हडलो वेवसाय सुरू करता, गॅरेज घालता, कावला अड्डो उबारता, नुस्त्याचें मार्केटूय सुरू करता. पूण, कोणूच ताका हरकत घेनात. रस्त्या देगेक दुकानां बांदपाक पंचायती परवानगी दितात. मुळांत अशीर रस्तो, तातूंत थंय गोरवां, दुकानांनी खरेदी करपाक लोक मोटारी उब्यो करतात. म्हणटकच हेरांक मनस्ताप. बेकायदेशीर गजाली जातातूच, पूण येरादारीच्या मुखेल रस्त्याक तेंकून आशिल्ल्या कांय दुकानांकूय सगले कायदेशीर परवाने आसात, ते कशे? चाळीस वर्सां पयलींचें दुकान, वेवसाय आसल्यार समजूं येता, पूण फाटल्या दोन- तीन वर्सांच्यां काळांत पसून असले प्रकार घडल्यात. प्रकरण आंगलट आयल्यार मागीर कोणाक तरी हाता कडेन धरून तातूंतल्यान सुटुया, असो विचार आतां सगलेच करपाक लागल्यात. पर्यावरणा खातीर हें धोक्याचें.
तार न्हंय पयलींच अशीर, उथळ जाल्या. तातूंत हे माती, फातर रकोवपाचे प्रकार. आतां थंय अतिक्रमण केलें जाल्यार पावसांत ताचो वायट परिणाम जावचो ना? न्हंयेचे देग वयलो वाठार उदका पोंदा वच्चो ना? आमदाराच्या मतान, न्हंय वाठार हो सरकाराची मालमत्ता. ताचेर कसलेंय अतिक्रमण अवैध. पूण तें करपी लोकांक हें खबर आसना तर? सगल्यांक सगलें नेम, कायदे खबर आसतात. तरीय ते धाडसान जाय तें करतात. तातूंतल्यान ते सुट्टातूय बी वा कोणाच्याच तें लक्षांत पसून येना. न्हंयेचें पात्र पुरोवप चुकीचें हें खबर आसतना ट्रक ड्रायव्हरान थंय माती ओतल्या जाल्यार तो स्वताच्या मनान हें करीत अशें दिसना. पुलीस आनी हेर सरकारी यंत्रणांनी हाची चवकशी करपाक जाय. ताका कोणें थंय माती ओतपाक लायल्या आसत जाल्यार तो मनिसूय सांपडटलो. मुळांत राज्यांत आसात इन- मीन तीन म्हणटात इतल्यो न्हंयो. तातूंत एके व्हडलें न्हंयेचें उदक शेजराचें राज्य वळोवपाक सोदता. प्रकरण न्यायालयांत आसून लेगीत तांणी उदक वळोवपा खातीर काम चालू दवरलां. उदक वळयलांय बी आसूं येता. कांय न्हंयो बुरश्यो जाल्यात. म्हणल्यार आमीच बुरश्यो केल्यात. तार सारकिल्ल्यो कांय न्हंयो सैमीक कारणांक लागून पुरवल्यात, आतां माती घालूनय त्यो आनीक पुरोवपाचे यत्न चल्ल्यात. सैमा खातीर प्रसिद्ध आशिल्ल्या, एका काळार सैम म्हणल्यार देव मानपी, सैमाच्या खुस्तार पोट भरपी गोंयांत सैमाचेर अशें आक्रमण जावप बरोवर न्हय. सरकारी यंत्रणांनी हातूंत लक्ष घालचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
