भांगरभूंय | प्रतिनिधी
चेन्नय : हजारांनी भक्त देवळांक भांगर, रुपें, पयशे दान करतात. मात खास करून वस्ती तश्योच पडून उरतात. आतां तामिळनाडू सरकारान देवळाचे उदरगती खातीर गुंतवणूक करपाक भक्तांनी दान केल्लें एक हजार किलां परस चड भांगर वितळ्ळां.
एके खाशेले येवजणे खाला भक्तांनी दान केल्लें आनी तमिळनाडूंतल्या 21 देवळांतलें वापरूंक नाशिल्लें भांगर वितळावन 24 कॅरेटाचे बार तयार केल्यात,. ते बँकेंत जमा केल्या उपरांत मेळिल्ल्या व्याजाचो उपेग देवळांचो विकास करपा खातीर जातलो.
तमिळनाडूंतल्या सगळ्या देवळांक भक्तांनी अर्पण केल्ल्या भांगराच्या वस्तूं पसून पयशे मेळपाक सुरवात जाल्या, हें भांगर वापरूंक नासतना पडिल्लें. राज्य सरकारान 21 देवळांतल्यान वापरूंक नाशिल्लें एक हजार किलां वयर भांगर वितळावन ताचें रुपांतर 24 कॅरेट भांगराच्या बारांनी केलां. ते गुंतवणूक येवजणे खाला भारतीय स्टेट बँकेंत जमा केल्यात, ताचेर वर्सुकी 17.81 कोटी रुपया व्याज मेळटा. मुंबयच्या सरकारी टांकसाळींत भांगर वितळ्ळें. ही म्हायती तमिळनाडू विधानसभेंत हिंदू धर्मीक आनी धर्मार्थ एण्डॉवमेंट्स (एचआर अँड सीई) मंत्री पी के शेखर बाबू हांणी सांगली.
31 मार्च 2025 मेरेन 21 देवळांतल्यान एकठांय जाल्लें वट्ट भांगर 10,74,123.488 ग्राम आसा. सगळ्यांत चड योगदान तमिळनाडूंतल्या तिरुचिरापल्ली जिल्ह्यांत आशिल्ल्या समयपुरमच्या अरुलमिगु मरियाम्मन देवळा पसून मेळ्ळें. ह्या देवळान सुमार 424.26 किल भांगर दिल्लें.
ही येवजण कांय काळ थांबयिल्ली. सरकाराची मान्यताय मेळ्ळ्या उपरांतच 2021-2022 वर्सा ती परतून सुरू जाली. भांगरा उपरांत आतां सरकारान वापरूंक नाशिल्ल्यो रुप्याच्यो वस्तू वितळपाकय परवानगी दिल्या. देवळांनी ते खातीर तयारी दाखयल्या.
सरकारान मान्यताय दिल्ल्या खाजगी कंपनींनी ह्या वस्तूंचें रुप्याच्या पट्ट्यांत रुपांतर करतले. विभागीय समित्यांच्या देखरेखी खाला, देवळां सामकार रुप्याचें वितळप जातलें. तीन न्यायाधीश समित्यांचे मुखेली आसात. रुपें वितळपाची प्रक्रिया कांय कडेन सुरू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
