भांगरभूंय | प्रतिनिधी
प्रसार माध्यमां लोकांक म्हायती दित आसतात. पत्रकार, वाचकूय स्वताचीं मतां दिसाळ्यां वरवीं मांडीत आसतात. खबरां चॅनलांय देश- विदेशांत कितें घडटा, ताची म्हायती लोकां मुखार दवरतात. मात, फाटल्या कांय वर्सांनी ह्या सगल्यांक फाटल्यान उडोवन आनीक एक प्रसारमाध्यम बरेंच मुखार पावलां, तें म्हणल्यार सोशल मिडिया. फेसबूक, ट्विटर, इन्स्टाग्राम, व्हाॅट्सअॅप, युट्यूब आनी हेर जायतीं….!! ताचेर सामान्यांतलो सामान्य नागरीक घरांत बसून स्वताचें मत आपल्या मोबायलाचेर उक्तावन तें जाय त्या सोशल मिडियाचेर घालपाक शकता…. आनी तें आयकुपा सारकें आसल्यार ताका प्रेक्षकूय मेळटा. सोमतेच तांचें बरें, वायट मतूय कळटा. सोशल मिडियाचेर फक्त प्रसिद्धीच न्हय, तर पोट भरपाकूय मेळटा. इन्स्टा, युट्यूबा वरवीं वेगवेगळ्या विशयांचेर व्हिडियो करून अर्थीक येणावळ मेळोवपी लाखांनी लोक आसात. सोशल मिडियान समाजांत क्रांती केल्या अशें म्हणल्यार अतिताय थारची ना.
कांय ब्लाॅगर, सामान्य लोक राजकारणाचेर प्रतिक्रिया दितात. त्यो आपले विचारसरणेचें, फुडाऱ्याचें समर्थन करपी आसल्यार उरिल्ल्या लोकांक आवडटात. मागीर ते ताची तुस्त, तोखणाय करतात… आनी विरोधक टिका. पूण त्यो आपले विचारसरणेच्या, फुडाऱ्याच्या विरोधांत आसल्यार संबंदीत लोकांक आवडनात. मागीर ते ताचेर तुटून पडटात… आनी तांचे (टिका करप्यांचे) विरोधक त्या विचारांची तुस्त, तोखणाय करतात. सांगपाचें म्हणल्यार दोनूय विचारांचें (कांय तिसऱ्याच विचारांचे) लाखांनी लोक समाजांत आसात आनी ते आपापल्या विचारां प्रमाण पोस्ट, मनीस पळोवन टिका आनी तुस्त करतात. पूण, कांय फुडाऱ्यांक आपल्या विरोधांत खंयच, कितेंच आयिल्लें आवडना. मागीर ते टिका करपी मनशाक अटक करतात वा हाताक सांपडल्यार वावुरप्यां वरवीं ताका मारपेट करतात. हे दोनूय प्रकार घडल्यात. आतांय घडटात.
तामिळनाडूचे मुख्यमंत्री एम के स्टॅलिन हांच्या विरोधांत 2021 त अपमानास्पद शेरो मारिल्ल्याच्या आरोपा वयल्यान अटक केल्ल्या यूट्यूब ब्लाॅगर ए. दुराईमुरुगन सत्ती हांकां पयर सर्वोच्च न्यायालयान जामीन मंजूर केलो. हाचे पयलीं तांणी कोणाच आड कमेंट करचो ना, अशी हमी दिल्ली. मागीर तांकां जामीन दिल्लो. पूण तांणी परत स्टॅलिन आनी हेरांचेर टिका केली म्हूणपरत अटक जाल्ली. मद्रास उच्च न्यायालयान तांचो जामीन रद्द केलो. आतां तांकां सोडटना सर्वोच्च न्यायालयाच्या खंडपीठान एक निरीक्षण नोंद केलां. सोशल मिडियाचेर आरोप, टिका करपी प्रत्येकाक बंदखणींत घालपाक मेळचें ना. तशें केल्यार वेंचणुके पयलीं कितल्या जाणांक भितर उडोवचे पडटले हाची कल्पना करची, अशें न्या. अभय ओक आनी न्या. उज्ज्वल भुयां हांणी म्हणलां. राजकी पक्षांनी हाचेर विचार करूंक फावो.
कांय राज्यां सोडल्यार आयज थळावे खबरां चॅनल, राष्ट्रीय खबरां चॅनल आपापल्या आवडट्या राजकी पक्षाची तळी उखलून नाचयतना स्पश्ट दिश्टी पडटात. कांय पत्रकार तर राजकी म्हणयारे जाल्ले भशेन भासाभास कार्यावळींनी वांटो घेतात. थोडे वेंचिक विशय घेवन चर्चेच्यो कार्यावळी करतात, वार्तापत्रां तयार करतात. बऱ्याच पत्रकारांनी खबरां चॅनल सोडून (काय तांकां राजिनामो दिवचो पडिल्ल्यान?) स्वताचे युट्यूब चॅनल काडल्यात. तामिळनाडूंत स्टॅलिन हांकां टिका सोंसली ना आनी तांच्या सरकारान हें पावल उखल्लें. सत्ती हांणी आपलीं मतां उक्तावन, स्टॅलिन हांचो निशेध करून स्वातंत्र्याचो गैरवापर करूंक ना, अशें सर्वोच्च न्यायालयान म्हणलां. जामिनाचेर आसतना तांकां टिकात्मक कमेंट करपाक दिवचे न्हय, ही विनवणीय न्यायालयान भायर मारल्या.
टिका करपाक हरकत ना. पूण ती मुद्देसूद आसपाक जाय. ओगीच विरोधा खातीर विरोध करून उपकारना. पुराय अभ्यास करून, पुरावे (व्हिडियो, ग्राफिक्स) दिवन, मुद्देसूद उलोवन, वर्मार बोट दवरपी भाश्य करून टिका करूं येता. विरोधकान ती मान्य करूंक ना तरी ताका ती मनांतल्या मनांत पटपाक जाय, अशें उलोवप आसचें. कांय जाण तशें उलयतात. पूण, तांचे विचारसरणेचे विरोधक मुद्द्याक जाप दिवपी कमेंट करीनासतना भलतेच कडेन व्हांवतात, आदलो इतिहास (तोय चुकीचो) खणटात, हें योग्य न्हय. हें सगल्याच विचारसरणेच्या बाबतींत दिसून येता. आपल्याक मान्य ना, ताका मुद्द्यान जाप दिवचे बदला गुद्द्यान (धुमक्यान) जाप दिवपाची पद्दत आतां रुढ जाल्या. अशी तोंकाची भुमिका घेवपी मेंदू घाणाक दवरिल्लेच लोक सोशल मिडियाचेर चड दिसतात. दोनूय वटेन!
तामिळनाडू सरकाराक दिल्ल्या ह्या एंडेलाचो सोशल मिडिया वापरपी कोणा- कोणाचेर परिणाम जाता तें आतां पळोवपाचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
