भांगरभूंय | प्रतिनिधी
माशेल, प्रतिनिधी: तामसुली-खांडोळ्यां सुमार धा मिटर लांब गणेश विसर्जन तळ्याची राखणे वणट सध्या पडपी पावसांत रस्त्या सकट तळ्याच्या उदकांत कोसळ्ळ्या. ह्या वेळार हांगा कोणूच नाशिल्ल्यान व्हड घडणूक जावपा पसून वाटवली.
सुमार २० वर्सां आदीं ही राखणे वणट पंचायत फंडांतल्यान लाखांनी रुपया खर्च करून बांदिल्ली. ती घोग्यांनी पडपी पावसाक लागून कोसळून लाखांनी रुपया उदकांत गेले, अशी प्रतिक्रिया हांगचे नागरीक उक्तायतात. ह्या तळ्या भोंवतणी राखणे वणटीचें बांदकाम करतना खुबश्या ग्रामस्थांनी तें सामकेंच सकयल्या दर्जाचें काम जाल्ल्याचो दुबाव उक्तायल्लो. तांचो दुबाव खरो थारलो.
हे विशीं नोंद करपा सारकी गजाल म्हळ्यार अंदूंची चवथ सामकी लागीं पावल्या. ताका लागून भाविकांक विसर्जना खातीर व्हडले समस्येक तोंड दिवचें पडटलें. जर ही वणट गणेश विसर्जना वेळार पडिल्ली जाल्यार व्हड संकश्टाक तोंड दिवचें पडपाचें.
हे घडणुकेची रोखडीच दखल घेवन पंचायतीन रोखडेंच चवथी पयलीं तात्पुरती उपाय येवजण करपाची मागणी गणेश भक्त करतात. हे घडणुकेक लागून वांगडा आशिल्लो रस्तो पुरायेन खचून वचपाची शक्यताय आशिल्ल्यान तो येरादारी खातर तात्पुरतो बंद करचो. ना जाल्यार व्हड दुर्घटना घडपाची शक्यताय न्हयकारूं येना, अशी मागणी हांगच्या नागरिकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
