भांगरभूंय | प्रतिनिधी
ड्राय आय, कन्झप्टीविटीसचो धोको; उदक चड पियेवपा सयत गॉगल वापरपाचो दोतोरांचो सल्लो
भांगरभूंय । प्रतिनिधी
पणजी : गोंयांत फाटले कांय दीस सेगीत तापमान वाडत आसा. हेर दुयेंसां सयत दोळ्यांचीं दुयेंसा वाडपाचो धोको आसा. ड्राय आय, कन्झप्टीविटीसचे (दोळे येवप) दुयेंती मेळपाचें प्रमाण वाडलां, अशी म्हायती दोळ्यांच्या दोतोरां कडल्यान मेळ्ळ्या. गोडे मूत (डायबिटीस) तशेंच जाण्ट्या लोकांनी वतांत भोंवतना जतनाय घेवपाक जाय. चड उदक पियेपा सयत गॉगल लावन वतांत भोंवप खूब फायद्याचें थारूं येता, असो सल्लो दोतोरांनी दिला.
पणजे बिरेस्तारा चडांत चड 35.2 अंश तापमानाची नोंद जाली. सरासरी परस तापमान 1.3 अंशांनी चड आसा. फुडल्या कांय दिसांनी 27 ते 35 अंशां मदीं तापमान आसतले, असो हवामान खात्याचो अदमास आसा. तापमानाक लागून उबाळ वाडत आसा. दनपारा वतांत रस्त्या वयल्यान चलपा सयत दुचाकी चलोवप लेगीत कठीण जाता. हेर दुयेंसां सयत दोळ्यांचीं दुयेसां वाडपाचो धोको उबाळ्याक लागून निर्माण जाला.
पणजे सध्या ड्राय आय (दोळे सुकप), कन्झप्टीविटीस (दोळे येवप) आनी स्टाय (आंदुर्ली) हांचे दुयेंती चड मेळपाक लागल्यात, अशी म्हायती पणजेची दोळ्यांची दोतोर डॉ. तन्वी रायतूरकार कामत हांणी दिली. वतांत चड भोंवल्या उपरांत दोळ्यांचें उदक उणें जाता. हाका लागून ड्राय आय दुयेंस जावपाचो धोको आसता. हाका लागून दोळे जळजळपा सयत दोळ्यांतल्यान उदक येवपाक सुरवात जाता. हाचेर उपाय म्हूण आर्टिफिशीयल टीअर ड्रॉप्स दोतोर वखद म्हूण दितात. चडांत चड उदक पियेपा सयत वतांत भोंवतना गॉगल वापरप हो सोंपो आनी सादो उपाय आसा. कन्झप्टिविटीस (दोळे येवप) हें दुयेंस वाडट्या उबाल्याक लागून जाता. हाचेर उपाय म्हूण दोतोर अॅन्टीबायोटीक दिता. स्टाय (आंदुर्ली) हें दुयेंस आशिल्ले दुयेंती मेळपाक लागल्यात. दोळ्यांच्या पापण्याक (आयलीड) उबाळ्याक लागून दुखापत जाता, अशें डॉ. तन्वी रायतूरकार कामत हांणी सांगलें.
उबाळ्याक लागून दोळ्यांचीं दुयेंसां वाडपाक लागिल्ल्या अशी म्हायती आमदार डॉ. चंद्रकांत शेट्ये हांणी लेगीत दिली. उबाळ्याक लागून दोळ्यां वयलो ताण वाडटा आनी दुकां येवपाक लागतात. वतांत भोंवल्यार हो त्रास जाता. दोळे थंड कशें उरतले, हाची जतनाय घेवपाक जाय. चडांत चड उदक पियेवप, वतांत गॉगल घालप आनी न्हीद घेवप हे उपाय आसात. एसींत बसप हो उपाय सारको न्हय. चड एसींत बसल्यार दोळ्यांक त्रास जाता, अशें डॉ. चंद्रकांत शेट्ये हांणी सांगलें. गोडें मुताच्या (डायबेटीस) दुयेंतींक दोळ्याचीं दुयेंसां जावपाची शक्यताय चड आसता. तांणी उबाळ वाडलो जाल्यार दोळ्यांची जतनाय ही घेवपाकूच जाय, असो सल्लो तांणी दिलो.
वाडट्या तापमाना वेळार दोळ्यांची जतनाय घेवपाचे उपाय
– चडांत चड उदक पियेवप
– वतांत भोंवतना योग्य तरेचें गॉगल लावप
– जाता तितलें एसींत बसपाचें टाळप
– दोळे चुरचुरल्यार वा दुकां आयल्यार दोतोरा कडेन वचप – पुराय न्हीद घेवपा कडेन लक्ष दिवप
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
