तापमान वाडिल्ल्यान नागरिकांचे भलायकी सुरक्षे खातीर मार्गदर्शक तत्वां जारी
भांगरभूंय | प्रतिनिधी
मडगांव: राज्यांत तापमान वाडत आशिल्ल्यान दक्षिण गोंय जिल्होधिकारी आनी जिल्लो आपत्ती वेवस्थापन प्राधिकरणाची अध्यक्ष एग्ना क्लिट्स हांणी नागरिकांचे भलायकी सुरक्षे खातीर मार्गदर्शक तत्वां जारी केल्यांत. उश्णतायेचो धोको टाळपा खातीर नागरिकांनी फावो ती जतनाय घेवची अशें आवाहन प्रशासनान केलां.
प्रशासनान जारी केल्ल्यो म्हत्वाच्यो सुचवण्यो
- उदक पियेवप: तान लागना जाल्यार लेगीत उदक पियेवचें. स्वताक हायड्रेटेड दवरपा खातीर ओआरएस, लस्सी, नाल्लाचें उदक, लिंबाचे उदक वा ताक घेवचें.
- कपडे: हलके, पातळ आनी कॉटन कपडे घालचे. भायर सरतना चश्मो, सत्री वा तोपी वापरची.
- प्रवास: प्रवास करतना सदांच उदकाची बाटली आपल्या वांगडा व्हरची. वतांत काम करचें पडल्यार तकली आनी मान ओल्या कपड्यान धांपचें.
- जनावर आनी सुकण्यांची जतनाय: पाळीव जनावरांक सावळेंत दवरून तांकां फावो तें उदक दिवचें. सुकण्यां खातीर उदकाच्यो बाटल्यो टेरेसाचेर वा बाल्कनीचेर दवरात.
- भलायकी: तुमकां अस्वस्थताय वा घुंवळ येता अशें दिसल्यार रोखडोच दोतोराचो सल्लो घेवचो.
ह्यो गजाली खरपणान टाळच्यो:
- दनपरां १२ ते ३ वरां मजगतीं वताक भायर सरप टाळचें.
- भुरग्यांक वा पोशिल्ल्या जनावरांक बंद वा वाहनांत सोडूं नाकात.
- गडद रंगाचे आनी घट्ट कपडे घालप टाळचें.
- सोरो, च्या, कॉफी आनी कार्बोनेटेड पेयां (थंड पेयां) टाळचें, कारण हाका लागून कुडींतलें उदक उणें जाता.
- उच्च प्रथिन आनी शेळें जेवण जेवप टाळचें.
उश्णतायेक लागून भलायकेचे गंभीर त्रास जावंक शकतात, देखून वेळार जतनाय आनी जागृताय केल्यार तुमकां सुरक्षीत दवरूं येता अशें प्रशासनान हे सुचोवणेंत सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
