भांगरभूंय | प्रतिनिधी
–
पणजी : रस्त्या कुशीचें तापमान नियंत्रणांत दवरपा खातीर ग्रीन टनेल रस्ते करपाचो प्रस्ताव आसा. ह्या प्रस्तावा खाला रस्त्या कुशीक झाडां लायतले. पणजेच्या दयानंद बांदोडकार रस्त्या सावन ह्या उपक्रमाची सुरवात जातली, अशें मुख्यमंत्री डॉ. प्रमोद सावंत हांणी सांगलें. हाचे खातीर सरकारान ट्री केअर फावंडेशना कडेन कबलात करपाचें थारायलां. झाडां लावपा सयत तांचें वेवस्थापन करपाची जापसालदारी ट्री केअर फावंडेशना कडेन आसतली, अशें मुख्यमंत्र्यांनी सांगलें.
इमेजीन पणजी स्मार्ट सीटीन शार झाडां वेवस्थापन कार्यशाळेचें आयोजन केलां. उक्तावणा वेळार मुख्यमंत्र्यांनी ही म्हायती दिली. सरकारान एकूय झाड कापूंक ना. मात नवीन झाडां लायल्यांत. कांय झाडां पोरणीं जाता आनी धोको निर्माण करतात. असलीं झाडां एक तर कापचीं पडटात वा दुसरे कडेन व्हरून लावचीं पडटात. रस्त्या कुशीक नवीं झाडां लावपा सयत पोरणीं झाडां दुसरे कडेन ट्रान्स्प्लान्ट करतले. हातुंतल्यान ग्रीन टनेल रस्ते तयार जातले. सगळ्यांत पयलीं पणजेचो डी बी बांदोडकार मार्ग हरीत मार्ग जातलो, अशें मुख्यमंत्र्यांनी सांगलें.
वैज्ञानीक रितीन झाडां लावपा सयत ताचें वेवस्थापन करपी कार्यशाळा ट्री केअर फावंडेशनाच्या सहकार्यान जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
