तापमानाक लागून उजो पातळपाची भिरांत

भांगरभूंय | प्रतिनिधी

उत्तर गोंय जिल्हाधिकाऱ्यां कडल्यान अॅडवायझरी जारी

पणजी: तापमान आनी वाऱ्याक लागून गोंयांत उजो पातळपाची भिरांत आसा. हे फाटभुंयेर पंचायत, नगरपालिका, वीज, येरादारी, भलायकी, पुलीस, भौशीक बांदकाम, रानां खात्यां सयत हेर खात्यांनी सतर्क रावून जतनाय घेवची, अशें निदेश उत्तर गोंय जिल्होधिकाऱ्यांनी दिल्यात. हे विशीं उत्तर गोंय जिल्होधिकाऱ्यांनी आपत्ती वेवस्थापना खाला हीट वेव अॅडवायझरी जारी केल्या.

गोंयांत उजो लागपाच्या घडणुकांनी वाड जाल्या. हरमला शेनवारा फांतोडेर उजो लागले उपरांत आयतारा मडगांवां वायन शॉपाक उजो लागलो. तशेंच होंडा – सत्तरी हांगा कड्डाक उजो लागलो. ह्या उज्याक लागून व्हड प्रमाणांत लुकसाण जालें. उजो पालोवपी दळाक शनवारा उज्या विशीं 26 जाल्यार आयतारा 11 कॉल आयले. ह्यो बारीक, मोट्यो उज्याचो घडणुकाे आशिल्ल्यो. उजो पालोवपी दळान उजो पालोवन लुकसाण जावपा पसून वाटायली. उजो पालोवपी दळाचे संचालक नितीन रायकार हांणी ही म्हायती दिली.

तापमान 30 ते 33 अंशा मेरेन आसता. दनपारां बारीकशी कीट पडली तरी वारो आनी तापमानाक लागून उजो पातळपाची भिरांत आसता. अशेच तरेन सद्या उजो पातळपाच्यो घडणुको जाल्यात, अशें तांणी सांगलें. रानांनी लेगीत सुकी पानां वा करड आसत जाल्यार ल्हानशी किटळी लेगीत उजो पातळपाक पुराय थारता. हाका लागून जतनाय घेवपाची गरज आसा, अशें संचालक नितीन रायकार हांणी सांगलें.

तापमान वाडत आशिल्ल्यान हीट वेव अॅडवायझरी जारी केल्या, अशी म्हायती उत्तर गोंयचे जिल्होधिकारी अंकीत यादव हांणी दिली. रानां खात्यान जवानां वरवीं रानां वाठाराचेर नदर दवरची. रानां वाठारांत उदकाचे स्रोत सुरक्षीत आसतले, हाची जतनाय घेवपाची सुचोवणी केल्या.

म्हायती खात्यान तापमान वा आवश्यक जतनाये विशीं एसएमएस जारी करून योग्य ती म्हायती नागरिकां मेरेन पावोवपाची वेवस्था करची.

पंचायत तशेंच नगरपालिका प्रशासन संचालनालयान डूज आनी डोंट हाची वळेरी तयार करून ती नागरिकां मेरेन पावोवची. भौशीक सुवातांचेर पियेवपाच्या उदकाची वेवस्था करची.

भलायकी केंद्रांनी दुयेंतींचेर बेगोबेग उपचार जावपा खातीर अतिरिक्त कर्मचारी/नर्सींची वेवस्था करची.

वीज खात्यान दुरुस्तीचीं कामां करतना सुरक्षेचो विचार करतना अपघात जावचो न्हय म्हणून सादूर रावपाची सुचोवणी आसा. सगल्या खात्याक मार्गदर्शक सुचोवण्यो जारी जाल्यात.