तानावडे हांणी एसटी मुद्याचेर दिलो भर

भांगरभूंय | प्रतिनिधी

विरियातो हांणी विरोध करून वेळ वगडायलोपणजीः राज्यसभेंत भाजपाचे खासदार सदानंद शेट तानावडे हांणी एसटी आरक्षणांचो विशय वेवस्थीत रितीन मांडलो. पूण लोकसभेत काँग्रेसचे दक्षीण गोंयचे खासदार विरियातो फर्नांडीस हांणी गोंयच्या हिता खातीर आयिल्ल्या प्रकल्पांक विरोध करून वेळ काडलो, असो आरोप भाजपाचो म्हणयारे गिरीराज पै वेर्णेकार हांणी केलो.

भाजपान आपले कचेरेंत बिरेस्तारा पत्रकार परिशद घेतली. पत्रकार परिशदेंत भाजपाचे म्हणयारे गिरीराज पै वेर्णेकार, मांद्रेंचे आदले आमदार दयानंद सोपटे आनी भाजपाचे चार्टर्ड अकांवंटंट जयराम खोलकर हजर आसले.

तानावडे हांणी एसटी राजकी आरक्षणांचो विशय वेवस्थीत रितीन मांडलो. हे आरक्षण गोंयाक कित्याक जाय हे समजावपाचो यत्न केलो. उण्या वेळा भितर ह्या विशयाचे म्हत्व पटोवन दिले, अशे रायकार हांणी सांगलें.

पूण काँग्रेसचे दक्षीण गोंयचे खासदार विरियातो फर्नांडीस हांणी गोंयच्या हिता खातीर येवपी प्रकल्पांक विरोध करून संसदेंत वेळ वगडायलो. तमनार आनी डबल ट्रेकींग प्रकल्प हे दक्षीण गोंयच्या हिता खातीर हाडल्यात. ह्या दोनूय प्रकल्पांक प्राधान्य दिवचे सोडून ताका कोळशाचो संदर्भ लावन लोकांचेर

अन्याय केलो, असो आरोप वेर्णेकार हांणी केलो.

विरियातो म्हणटात, सरकारान लोकांक विश्वासात घेवंक ना. ज्या लोकांक विश्वासात घेवंक ना ते

काँग्रेसचे कार्यकर्ते काय पर्यावरण वादी जावन पैयशे जोडपी हे विरियातो हांणी स्पष्ट करपाची गरज आसा. डबल इंजीन सरकारान हाडिल्ले प्रकल्प हिता खातीरूच आसात हे ल्हव ल्हव गोंयकारांक आतां कळपांक लागला, अशें गिरीराज हांणी म्हणलें.

तशेंच केंद्राच्या अर्थसंकल्पांत बायला, कर्मचारी वर्ग, तरणाटे आनी शेतकार हांच्या खातीर जायत्यो येवजण्यो जाहीर केल्यात, अशें मांन्द्रें मतदारसंघाचे आदले आमदार दयानंद सोपटे हांणी सांगलें.

आदीवासी भावां खातीर 13 हजार कोटी रुपयांची तजवीज आदीवासी कल्याण खात्यान केल्या तशेंच बायलां आनी चलयांच्या कल्याणा खातीर 3 लाख कोटींची तजवीज केल्या. तरणाट्यांचें शिक्षण ते नोकरी मेरेन अर्थसंकल्पांत बरी तजवीज केल्या. शिक्षण मळार 10 लाख कोटींची तजवीज केल्या आनी जे तरणाटे शिक्षण जाले उपरांत वेवसाय करपाक सोदतात तांचे खातीर मुद्रा येवजणेची मर्यादा

10 लाख ते 20 लाख मेरेन वाडयल्या, अशें सोपटे हांणी सांगलें.