….ताच्या आंगा वयल्यान १४ गाडयो गेल्यो

भांगरभूंय | प्रतिनिधी

वॉशिंग्टन: टूरिस्ट व्हिसाचेर अमेरिका भोंवडेर गेल्लो दर्शील ठक्कर (गुजरात) ह्या तरणाट्याक अपघातात मरण आयले. रस्तो हुंपताना ताचो अपघात जालो आनी ताच्या वयल्यान 14 गाडयो गेल्यो.
गुजरातांतल्या पाटण गांवांत रावपी दर्शील चार म्हयन्यां आदीं पर्यटन व्हिसा घेवन अमेरिकेंत गेल्लो. 29 जुलयाक सकाळीं 11:30 वरांचेर रस्तो हुपतना वेगान वचपी गाडयेन ताका धपको दिलो. हाचे उपरांत 14 गाडयो ताचे कुडी वयल्यान गेल्यो आनी ताका जाग्यारच मरण आयलें. हातूंतली एकूय गाडी रावंक ना. हाचे वयल्यान ड्रायव्हरांची मस्ती, मद कितलो तो दिसता.
अपघात जालो तेन्ना दर्शीला वांगडा ताचो एक इश्ट आशिल्लो ताच्या म्हणण्या प्रमाण दर्शील रस्तो हुंपतालो तेन्ना सिग्नल बंद आशिल्लो. पूण सारको त्याच वेळार सिग्नल सुरू जालो आनी वेगान येवन एका गाडयेन ताका धपको दिलो. देखून तो सकयल पडलो. हाचे उपरांत एका फाटल्यान एक गाडयो अश्यो 14 गाडयो ताचे कुडी वयल्यान गेल्यो आनी ताका जाग्यारुच मरण आयलें. ताच्या इश्टानच दर्शीलाच्या मरणाची म्हायती ताच्या कुटुंबाक दिली.
ताच्या कुटुंबान दर्शीलाची कुड भारतांत हाडपा खातीर अधिकाऱ्या कडेन संपर्क केलो. पूण कुडीची स्थिती खूब वायट जाल्ल्यान ती भारतांत हाडप शक्य ना. ते खातीर दर्शीलाच्या घरांतले वांगडी अमेरिकेंत गेले आनी थंयच ताचे कुडीचेर निमाणे संस्कार जातले. दर्शीलाच्या अचकीत मरणाक लागून कुटुंब आनी इश्टांक धक्को बसला.