भांगरभूंय | प्रतिनिधी
यमुनानगर, खबरां संस्था: रामेश्वर दास हांकां मरण आयिल्ल्याचें समजून तांचें कुटूंब फाटल्या ४० वर्सां सावन तांचें श्राद्ध वाडटालें. ते हरियाणांत जिवे सांपडल्यात. यमुनानगरच्या ‘नी आसरे दा आसरा’ ह्या शेल्टर होमाच्या वांगड्यांनी म्हयन्यां पयलीं कुरुक्षेत्र सरकारी हॉस्पिटला मुखार मानसीक दुयेंती रामेश्वर दास हांची सुटका केल्ली. चवकशी केली तेन्ना रामेश्वर हे जायत्या दिसां सावन हांगा रावता अशें समजलें.
पडिल्ल्यान ते जखमी जाल्ले. तांकां सारकें चलपाक जमनासलें. उपरांत तांकां यमुनानगरच्या मगरपूर गांवांत आशिल्ल्या शेल्टर होमांत व्हेले. थंय तांचेर उपचार जाले. चवकशी केले उपरांत ते बिहारच्या गया जिल्ह्यांतल्या बडी खाप गांवांत रावपी हें कळ्ळें. शेल्टर होमाच्या वांगड्यांनी रामेश्वर हांचो व्हडलो पूत राजू भारतीचो फोन नंबर सोदून ताका फोन केलो. तो आनी ताचो भाव आनी हेर कांयजाण यमुनानगर आयले. रामेश्वर हांकां पळोवन तांच्या कुटुंबांतले सगळे रडपाक लागले. उपरांत तीं रामेश्वर हांकां घरा घेवन गेलीं.
राजू भारती हांणी सांगलें : तांचो बापूय ४० वर्सां आदीं तांकां कांयच सांगिनासतनाच घर सोडून गेल्लो. उपरांत तो घरा येवंक ना आनी ताचे कडेन कसलोच संपर्कूय जावंक ना. तो ह्या संवसारांत ना अशें सगळ्यांनी मान्य केल्लें. उपरांत दर वर्सा बापायचें श्राद्ध करपाक लागले.
रामेश्वर हांचे विशीं कुरुक्षेत्रांतल्यान फोन आयलो
शेल्टर होमचे वांगडी जसकीरत सिंग हांणी सांगलें : आशिकुशीकच्या जिल्ह्यांनी निराधार लोक भोंवतात. आमी तांचेर उपचार करतात. आमच्या एका वांगड्यान कुरुक्षेत्रांतल्यान फोन केल्लो. थंय गेले उपरांत रामेश्वर दास हांची प्रकृती हुस्को करपा सारकी आशिल्ली तें कळ्ळें. उपरांत शेल्टर होमांत उपचार सुरू केले. समुपदेशना उपरांत ते बिहारचे आशिल्ल्याचें कळ्ळें.
घरच्यांचो विस्वासूच बसनासलो
जसकीरत सिंग हांणी सांगलें : आमची ट्रॅकिंग टीम रामेश्वर हांच्या घरा पावली. ताच्या कुटुंबांतल्या सगळ्यांक रामेश्वर हांकां मरण आयिल्ल्याचें समजल्लें. जेन्ना घरच्यांक ही गजाल कळ्ळी तेन्ना तांचो विस्वास बसना जालो.उपरांत तांकां व्हिडिओ कॉलार आपयलें.
रामेश्वर हरियाणांत कामाच्या सोदांत आयिल्ल्याचें समजलें. थंय तांची भलायकी इबाडपाक लागली. उपरांत तांकां घरा वचप शक्यूच जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
