भांगरभूंय | प्रतिनिधी
भांगरभूंय । प्रतिनिधी
फोंडेंः ताकार- दावकोण हांगा आयतारा न्हांवपा खातीर आयिल्ल्या पर्यटकाची गाडी न्हंयेंत अर्दवट बुडपाची घडणूक जाली. गाडी धुवपा खातीर उदकांत व्हेली मात उदकाचो अदमास आयलो नाशिल्ल्यान व्हो प्रकार घडलो. न्हांवपाक गेल्ल्या बऱ्याच जाणांक हे सुवातेर बुडून मरण आयिल्लें आसा. हे सुवातेर संरक्षक उपाय येवजण करपाची लोकांची मागणी आसा.
उबाळो वाडपाक लागल्ल्यान लोक न्हांवपा खातीर न्हंयेत येवपाक सुरवात जाल्या. जायते कडेन न्हंयेंत न्हावपाक मनाय केल्ल्यान लोक सध्या ताकार- दावकोण हांगा दूदसागर न्हंयेर बांदल्ल्या बंधाऱ्यार न्हांवपाक गर्दी करपाक लागल्यात. आयतार आनी सुटयेच्या दिसांनी लोक न्हांवपा खातीर येतात. आयताराक एका पर्यटकान आपली गाडी न्हंयेत धुवपा खातीर व्हेली मात उदकांत ती अर्दवट बुडली. दुसऱ्या वाहनाचे मजतींत ती न्हंयेतल्यान ओडून भायर काडली.
फाटल्या कांय दिसा सावन हे सुवातेर लोक येवपाक लागल्यात. न्हांवपाक येवपी लोक सोरो पियेवन बाटल्यो फोडून वडयतात. न्हांवपा खातीर न्हयेंत देवपी लोकांक उदकाचो अदमास येना आनी दुर्घटना घडटात. हे सुवातेर न्हांवपाक बंदी घालची वा पुलीस दवोरचे अशी थळाव्या लोकांची मागणी आसा. सोऱ्याचे घुंवळेंत आडांगपणा करपी पर्यटकांचेर कारवय करपाक जाय. वाहनां धुवून न्हंयचें उदक प्रदुशीत करपाचे प्रकार आडावपा खातीर न्हयेर वचपाची रस्तो पंचायत मंडळान बंद करचो अशें गुरू गांवकार हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
