भांगरभूंय | प्रतिनिधी
तांब्याच्या आयदनांत रातभर दवरिल्लें उदक पियेवपाचे जायते फायदे आसात. आयुर्वेदांत लेगीत तांब्याच्या आयदनांतल्या उदकाक म्हत्व दिलां. तांब्याच्या आयदनांतलें उण्यांत उणें आठ वरां दवरिल्लें उदक पियेल्यार कुडींतली अशुद्धताय भायर काडून यकृत आनी मूत्रपिंड निरोगी उरपाक मजत जाता अशें म्हण्टात. तांब्यात अँटी मायक्रोबियल, अँटिऑक्सिडंट आनी हेर जायते भलायकेक फायद्याचे गुणधर्म आसतात.
१. पचन क्रिया घटमूट उरता
पोटाचे, यकृत आनी मूत्रपिंडाचे त्रास जाल्यार तांब्याच्या आयदनांतल्यान उदक पियेवपाचो सल्लो दितात. पोट, यकृत आनी मूत्रपिंड हांचेमदीं विखारी पदार्थ काडून उडोवपाक तांब्याच्या आयदनांत जायते गूणधर्म आसतात. तशेंच पोटाचे अल्सर वा इन्फेक्शनची समस्या उणी जाता अशें म्हण्टात.
२. संसर्गजन्य दुयेंसांचेर आळाबंदा हाडप
तांबें ऑलिगोडायनिक म्हणून वळखतात. हाचो अर्थ तातूंत बॅक्टेरिया नश्ट करपाची प्रभावी तांक आसता. संसर्गजन्य दुयेंसां निर्माण करपी बॅक्टेरिया आड हें उदक प्रभावी थारता अशें मानतात.
३. मोटसाण उणी करता
हालीसराक वजन उणें करपा खातीर वेगवेगळे उपाय करतात. वजन उणें करपाचो विचार करपी लोकांक तांब्याच्या आयदनांतले उदक पियेवप फायद्याचे अशें मानतात. ताका लागून पचनक्रिया सुदारता आनी कुडींतली वायट चरबी बेगीन उणी करपाक मजत जाता.
४. आयुर्वेदां प्रमाण उणें आठ वरां दवरिल्लें उदक पियेवचें
फकत आयुर्वेदांत न्हय, तर शास्त्रज्ञ आनी तज्ञांनी तांब्याच्या आयदनांत दवरिल्लें उदक पियेवप फायद्याचें अशें सांगलां. तांब्याच्या आयदनांत उदक उण्यांत उणें आठ वरां दवरल्यारच उदकाचो पुराय फायदो मेळटा. तशेंच रातभर तांब्याच्या आयदनांत दवरिल्लें उदक सकाळीं पियेवप फायद्याचें थारता.
५. थायरॉयडा खातीर तांब्याच्या आयदनांतलें उदक पियेवप फायद्याचें
तांब्याच्या आयदनांतलें उदक पियेल्यार थायरॉक्सीन हार्मोन्स समतोल दवरपाक मजत जाता. हाका लागून थायरॉयडाचो धोको ना जाता. तशेंच तांब्यांत अँटी-इन्फ्लेमेटरी गुणधर्म आसतात आनी ताका लागून कुडींतली दुखणी आनी सुज उणी जाता. हे खातीर दर दिसा सकाळीं आनी सांजवेळार तांब्याच्या आयदनांतलें उदक पियेवचें. तशेंच तांब्याच्या आयदनांतले उदक पियेल्यार कुडींतलें युरिक अॅसिड उणें जावपाक मजत जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
