भांगरभूंय | प्रतिनिधी
सर्द आनी वायंगणी पिकांक फटको
भांगरभूंय । समीप नार्वेंकार
पणजी : पोरूंचे तुळेंत 2024-25 त गोंयांत तांदूळ तशेंच कड्डणाच्या उत्पन्नांत 18 हजारां परस चड टनांनी उणाव नोंद जाला. दर हॅक्टरा फाटल्यान तांदळाचे पिकावळींत 565 कील जाल्यार कड्डणाचे पिकावळींत 62 कील इतलो उणाव नोंद जाला, अशी म्हायती शेतकी संचालनालयांतल्या वरीश्ठ अधिकार्यान दिल्या.
अधिकार्यान दिल्ले म्हायती प्रमाण 2023-24 त सर्द आनी वायंगण शेतांत 98,443 टन तांदूळ आनी कड्डणाचे पिकावळीची नोंद जाल्ली. फाटल्या हंगामांत 2024-25 त 80,128 टन तांदूळ आनी कड्डणाचे पिकावळीची नोंद जावन 18,320 टन इतलो उणाव नोंद जाला.
2023-24 त पावसाळी हंगामांत 23,455 हॅक्टर वाठारांत भाताची लागवड जावन दर हॅक्टर 2886 कील इतलो तांदूळ पिकलो आनी 67,698 टन इतली पिकावळ नोंद जाली. जाल्यार गिमाळ्या हंगामांत 9022 हॅक्टर क्षेत्रांत भाताची लागवड जावन दर हॅक्टर 2983 कील तांदूळ पिकलो आनी 26,913 टन इतली पिकावळ नोंद जाली.
2024-25 त पावसाळी हंगामांत 23,878 हॅक्टर वाठारांत भाताची लागवड जावन दर हॅक्टर 2171 कील तांदूळ पिकलो आनी 51,848 टन पिकावळ नोंद जाली. जाल्यार गिमाळ्या हंगामांत 8735 हॅक्टर क्षेत्रांत भाताची लागवड जावन दर हॅक्टर 2832 कील तांदूळ पिकलो आनी 24,741 टन पिकावळ नोंद जाली.
गोंयांत कड्डणांची पिकावळ ही गिमाळ्या शेता वेळार काडटात. हातूंत चड करून हळसांदे ह्या पिकाचो आस्पाव आसता. 2023-24 त 3385 हॅक्टर क्षेत्रांत कड्डणाची लागवड जावन दर हॅक्टर 986 कील कड्डण तयार जावन 3822 टन पिकावळ नोंद जाली. जाल्यार 2024-25 त 3829 हॅक्टर वाठारांत कड्डणाची लागवड जावन दर हॅक्टर 924 कील कड्डण तयार जावन 3539 टन पिकावळ नोंद जाली. 283 टन उणाव हे खेपे नोंद जालो. पोरूंचे तुळेंत 2024-25 त पावसाळी हंगामांत भाताचे लागवडींत 423 हॅक्टर वाड जाल्ली. मात पिकावळींत 15,850 टन उणाव नोंद जालो. गिमाळ्या हंगामांत भाताचे लागवडींत 287 हॅक्टर उणाव जावन पिकावळींत लेगीत 2172 टन उणाव नोंद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
