भांगरभूंय | प्रतिनिधी
संरक्षण मंत्र्यान घेतली जवानांची भेट
आतंकवादा आड खंयचेय मर्यादे मेरेन वचपाची तयारी
ऑपरेशन सिंदूर आयज मेरेनची व्हड कारवाय
खबरां संस्था
श्रीनगर : आतंकवाद सोंपोवपाक भारत खंयचेय मर्यादे मेरेन वचपाक शकता. पहलगामांत आतंकवाद्यांनी धर्म विचारून हत्या केल्ली आमी कर्म पळोवन तांकां मारले. ऑपरेशन सिंदूर उपरांत पयले खेपे बिरेस्तारा संरक्षण मंत्री राजनाथ सिंह जम्मू-काश्मीर पावले. ह्या वेळार तांणी जवानांची भेट घेतली आनी आपल्या उलोवपांत तांणी जवानांचे उपकार मानले. तुमचे मदीं येवन आपल्याक अभिमान दिसता. प्रधानमंत्री नरेंद्र मोदी हांच्या कुशळ फुडारपणा खाला आनी मार्गदर्शनांत ऑपरेशन सिंदूर वेळार तुमी जें केलें ताचो पुराय देशाक अभिमान आसा, अशें तांणी आपल्या उलोवपांत सांगलें.
राजनाथ सिंह हांणी सांगलें, पहलगामा उपरांत जम्मू-काश्मीराच्या लोकांनी पाकिस्तान आनी आतंकवाद्यां आड आपली तिडक उक्तायली. जम्मू-काश्मीराच्या लोकांकूय आपूण सलाम करतां. आपूण हांगा ती उर्जा अणभवपाक आयलां, जिणें दुस्मानाक काबार केले. जे तरेन तुमी शिमे पलतडच्यो पाकिस्तानी चौकी आनी बंकर नश्ट केले, ते पळयल्यार दुस्मान ते केन्नाच विसरचे नात, अशें आपल्याक दिसता.
पहलगामांत आतंकवाद्यांनी धर्म विचारून आमच्या निर्दोश लोकांक मारले. ते परांत तुमी जी जाप दिली ती पुराय संवसारान पळयली. आपले भुंयेर आतंकवादाक कसलीच मजत करचे नात, अशें सुमार 21 वर्सां आदीं अटल बिहारी वाजपेयी हांचे मुखार ह्याच पाकिस्तानान इस्लामाबादांत जाहीर केल्लें. पूण पाकिस्तानान भारताचो विस्वासघात केलो. ताचें फारीकपण करपाक तांकां खूब मोल दिवचें पडटा आनी हें मोल एकसारकें वाडत वतलें, अशें सिंह हांणी सांगलें.
ऑपरेशन सिंदूर ही इतिहासांतली आयज मेरेनची सगल्यांत व्हडली कारवाय. आतंकवादा आड आमी खंयचेय मर्यादे मेरेन वचपाक शकता, हें आयज भारतान पुराय संवसारा मुखार स्पश्ट केलां, अशेंय संरक्षण मंत्र्यान सांगलें.
आनीक तीन आतंकवाद्यांक सोंपयले
जम्मू-काश्मीराच्या पुरवामा जिल्ह्यांत बिरेस्तारा सुरक्षा दळा वांगडा जाल्ल्या फारपेटांत जैश-ए-मोहम्मदच्या (जीईएम) तीन आतंकवाद्यांक मारले. अधिकाऱ्यांनी दिल्ले म्हायती प्रमाण अहमद शेख, आमीर नजीर वानी आनी यावर अहमद भट अशीं ह्या आतंकवाद्यांचीं नांवां आसात. सगले जम्मू-काश्मीराच्या पुलवामा जिल्ह्यांत रावपी. मजगतीं, फाटल्या 48 वरां भितर हो दुसरो फारपेट आशिल्लो. तातूंत सुरक्षा दळाच्या जवानांनी केल्ले हे कारवायेंत 6 थळाव्या आतंकवाद्यांक मारून उडयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
