भांगरभूंय | प्रतिनिधी
आमचो सांतान गांवचो लोक वर्सान वर्स जावपी तवशांच्या फेस्ताची उमेदीन आनी उमळशीकेन वाट पळयतात. हें फेस्त सांत आन इगर्जेचें, आनी ह्याच सांत आन सायबिणीचें नांव आमच्या सांतान गांवाक पडलां. ‘सांतान’ – ‘सांत’ आनी ‘आन’. 26 जुलयाक तिचो दीस पूण सगळ्या गांवच्या आनी गांवा भायल्या लोकांक हुसक्या मेकळो करून हे परबेंत भागी जावचें म्हण हें फेस्त आयतारचें मनयतात.
हें फेस्त ‘तवशांचे फेस्त’ म्हण फामाद आसा कारण पयलें म्हणल्यार पावसा दिसांनी आमच्या सांतान गांवांत घराघरांनी तवशीं जाताण आनी हीं तवशीं फेस्ता दिसा सायबिणीक ओंपतात. गांवचीं जाण्टीं आनी बायलां तवशीं विकूंक बसतात. नवी लग्न जाल्ली व्हंकल आनी न्हवरे ह्या फेस्ताक मुद्दम येतात आनी भुरग्यांचें सूख मेळटलें ही आस्त दवरून सायबिणीक तवशीं ओंपतात. जांकां सायबिणीच्या आर्शिवादान भुरगीं जाल्यांत, तीं तांच्या ल्हान भुरग्यांक घेवन सायबिणीक तवशीं ओंपपाक येतात.
गांवचे कांय लोक जे कामा खातीर गोंयां वा भारताच्या भायर गेल्ले आसतात ते मुद्दम ह्या फेस्ता खातीर जुलय म्हयन्यांत येतात. फेस्ता दिसा सगळ्या हिंदू आनी क्रिस्तांव घरांनी रुचीक जेवण करतात – चिकन, पुलाव, आदी. पूण सगळ्या घरांनी ह्या फेस्ताचें गोड जिनस आसताच, तें म्हणल्यार ‘सान्ना’. तांदळाच्या पिठान, गोडान वा सयेन केल्लो हो जिनस फेस्ता दिसा सकाळचोच तयार करून दवरल्लो आसता. आनी हें मागीर ह्या परबेचें गोड अशें खावपाक दितात.
पुराय गांवचे हिंदू आनी क्रिस्तांव लोक व्हडा उमेदीन ह्या फेस्ताक वांटेकार जावन फेस्त मनयतात. सांतान सायबिणीचेर गांवच्या सगल्या लोकांचो विश्वास आनी आस्त. पायां कडेन. म्हजें घर सारकें सायबीणीच्या पायां
कडेन. म्हजी आवय तर म्हाका सदांच सांगी, हांव लहान आसलें तेन्ना म्हजो बापूय रातचो कामाक वतालो तेन्ना ह्या रानांत सायबीणीच्या आदारान आनी विश्वासान आमी हुस्क्या मेकळीं जावन न्हिदतालीं.
ह्या इगर्जेचो इतिहास पळयत जाल्यार, ही इगर्ज 17 व्या शतकांत पुर्तुगेजां वेळार बांदून पुराय जाल्ली. जेन्ना हे इगर्जेचें बांदकाम चालू आसलें तेन्ना गांवांत रावपी एक जाण्टी बायल बार्थालोमॉव (Barthalomor Marchon), तिच्या सपनांत एक बायल चॅपें
घालून, हातान एक सामानाची पेटी कशी घेवन, पळोवपाक सुंदर, तिच्या मुखामळार एक वेगळोच तेज आसलो. तिच्या सपनांत ती इगर्ज आपलें घर अशें दाखोवन दिलें.
अशें म्हणटात की सारस्वत जातीची एक बायल सामकी दुयेंत आसली आनी तिच्या दुयेंसाक कांयच उपाय नासलो. एक दीस तिच्या फुड्यान तशीच बायल – जी जाण्टे बायलेक सपनांत दिशिल्ली, ती दिश्टी पडली. तिच्या रुपाक एक तेज आसलें. ती थंयच्यान वयताच
दुयेंत आशिल्ली बायल बरी
जाली. पुराय गांवांत ही खबर पसरली. गांवच्या पाद्रीक ही चमत्काराची गजाल कळटाच, ही इगर्ज सांत आन सायबिणीच्या नांवार केली. ते दुयेंत बायलेन मागीर सायबिणीचे आभार मानपाक आपलो धर्म बदल्लो आनी ती क्रिस्तांव जाली.
इगर्जेच्या सामक्या वयल्या भागांत सपनांत दिशिल्ले सायबिणीची हांगा खरीं कशीं दिसपी चित्रां दवरिल्लीं आसात. म्हाका दिसता एकदां तरी सगळ्यांनी आमच्या सांतान गांवच्या सांत आन सायबिणीच्या फेस्ताक येवन तिचो आशिर्वाद घेवचो.
ग्लक्षा घनशाम वेर्णेंकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
