भांगरभूंय | प्रतिनिधी
अयातुल्ला मुजतबा खामेनी हांची अमेरिकेक शिटकावणी
खबरां संस्था
तेहरान : मध्य पूर्वेंतले अमेरिकेचे सैन्य तळ बंद करचे पडटले ना जाल्यार त्या तळांचेर हल्ले चालूच उरतले, अशी इराणाचे नवे सर्वोच्च फुडारी अयातुल्ला मुजतबा खामेनी हांणी पदभार स्विकारले उपरांतच्या तांच्या पयल्याच संदेशांत तांणी अमेरिकेक शिटकावणी दिल्या.
इराणाचे सरकारी टीव्हीचेर वाचिल्ल्या संदेशांत खामेनी हांणी म्हणलें, सध्याचे परिस्थितींत स्ट्रेट ऑफ होर्मुझ उक्तो करचे नात. सर्वोच्च फुडारी जाले उपरांत मुजतबा हांचो हो पयलोच भौशीक संदेश आसा. अमेरिका, इझ्रायल आनी इराण हांचे मदलें झूज दिसान दीस खर जायत आसतना हें विधान आयलां.
रिपोर्टा प्रमाण अमेरिका आनी इझ्रायली हल्ल्याच्या पयल्या दिसा मुजतबा खामेनी हांचो पांय मोडिल्लो आनी किरकोळ जखम जाल्ली. त्याच हल्ल्यांत तांचो बापूय आदले सर्वोच्च फुडारी अयातुल्ला अली खामेनी हांकां मरण आयिल्लें.
भारतीय बोटींक परवानगी
अमेरिका, इझ्रायल आनी इराणांत चालू आशिल्ल्या झुजा वेळार लेगीत भारतीय बोटी स्ट्रेट ऑफ होर्मुझांतल्यान वचपाक शकतल्यो. इराण सरकारान हे खातीर परवानगी दिल्या, अशें खबरां संस्था एएनआयन सुत्रांचो हवालो दिवन म्हणलां.
अहवाला प्रमाण, अमेरिका आनी इझ्रायली हितसंबंदां कडेन संबंदीत नाशिल्ल्या बोटींक ह्या मार्गांतल्यान वचपाची परवानगी दितले. हेच खातीर भारतीय बोटींक सध्या सुरक्षीत मार्ग दिला. हाचे आदीं, इराणान स्ट्रेट ऑफ होर्मुझांतल्यान वचपी बोटींचेर हल्लो करपाची धमकी दिल्ली. मजगतीं, बुधवारा राती इराणान पर्शियन खाडींत ‘सेफासी विष्णू’ नांवाच्या अमेरिकी तेल टँकराचेर हल्लो केलो. ह्या हल्ल्यांत एका भारतीय नागरिकाक मरण आयलें. ताची वळख सध्या जाहीर करूंक ना. खबरां संस्था पीटीआयच्या म्हणण्या प्रमाण, ह्या हल्ल्यांत एका आत्मघाती बोटीचो वापर केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
