भांगरभूंय | प्रतिनिधी
गरमेच्या दिसांनी, तळयेर न्हावप म्हणल्यार सर्गर्ग सूख…. ह्या दिसांनी आंगाचो सामको उजो उजो जाता आनी कुडीक थंडसाण दिवपा खातीर आपसुकच आमचे पांय तळ्या कडेन, व्हाळादेगेर, दर्यादेगेर ओडत वतात. वरांचीं वरां उदकांत बुडून रावन कशें दिसता. उंचाये वेल्यान एका नेटार तळ्यांत सूर मारप आनी वेळ काळ हाचे भान दवरिनासतना थंड-नितळ उदकांत चिंब्ब भिजून वचप, पेंवप… आनी मागीर सडसडीत भूक लागतकूच रानांतली चारा, चुन्नां, जांबळा, पोणसुलां भकावप, हाचे सारको दुसरो सर्ग ना.
पाचवेचार दोंगुल्ले वेल्यान व्हांवत येवन तळयेंत मिसळपी थंड नितळ उदक. गांवचे तरणाटे एकठांय जावन वर्साक एक दोनदां ही तळी उस्पितात, निवळ करतात. उदक तळ्यांत सांचून उरना. वातनी करुन उदक तळ्याचे सकयल, कुळागरां, भाटां-बेसां आसात थंय सोडिल्लें आसता. भाटां-बेसां, कुळागरां हांकां पाचवेचार दवरपाची जापसालदारकी ही तळी घेता. तळ्याचे सरभोंवतणी नेटान आनी झेतान चारूय दिकांनी फांकिल्ली आनी सैमाचो अविश्कार दाखोवपी विंगड विंगड झाडां, पेडां आनी तांचो आधार घेवन वयर चडपी वाली… विंगड विंगड सवण्याच्या रडपा-खिदळपाचे तळ्यार घुमपी आवाज मनांक पिशें लायतात. तानेल्ले रानदुकर, गवे रेडे दनपारच्या वेळार ना जाल्यार सांजवेळार उदक पिवपाक तळ्यार भिरी करतात.
श्रावण म्हयन्यांत जेन्ना धर्तरी नवे व्हंकले सारखी सजून धजून पाचवीचार जाल्ली आसता. वत आनी पावस हांचो आपा-लिपांचो खेळ सुरू आसता. तेन्ना मळब भरून यतकूच मोराचे बेधुंद जावन नाचप अणभवपाक मुजरत ह्या तळ्याचे देगेर येवन बसचे पडटा. निळसर मळबांत इंद्रधोणुची सात रंगाची शिरवणांत चलिल्ली रंगांची उधळण पळयतलो जाल्यार तळये इतली बरी सुवात खंयच ना! वताचो आपा-लिपांचो खेळ, उटंगाराचो पावस, जोगलां अणभवपाक ह्यो तळयो तुमकां पावसाच्या दिसांनी आपोवणें धाडटात.
अशें म्हणटात की ह्या उदकांत वखदाचे गूण आसतात आनी ताकाच लागून तळयेर न्हाण घेतकूच मनशाक एकदम ताजे-तवाने दिसूंक लागता. थाकाय एकदम पयसावता!!
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
