भांगरभूंय | प्रतिनिधी
गर्मेच्या दिसांनी, तळयेर न्हावप म्हणजे स्वर्ग सुख…. ह्या दिसांनी आंगाचो उजो- उजो जाता आनी कुडीक थंडसाण दिवपा खातीर आपसुकच आमचें पांय तळ्या कडेन ओडत वतात. वरांच्या वरा तळयांनी बुडुन रावन कशें दिसता. उंचाये वेल्यान एका नेटार तळ्यांत सुर मारप आनी वेळ- काळ हाचे भान दवरिनासतना थंड- नितळ उदकांत चिंब्ब भिजुन रावप, पेवप…आनी मागीर सडसडीत भूक लागतकुच रानांतली चारां, चुन्नां, जांबळां, पणसुलां भकप, हाचे सारको दुसरो सर्ग ना.
पाचव्याचार दोंगुर्ले वेल्यान व्हांवत येवन तळयेंत मिसळपी थंड नितळ उदक. गांवचे तरणाटे एकठांय जावन वर्साक एक- दोनदा ही तळी उस्पितात, निवळ करतात. उदक तळ्यांत सांचून उरना. वाटनी करुन उदक तळ्याच्या सकल, कुळागरां -भाटां- बेसां आसात थंय सोडिल्लें आसता. तांकां पाचवेंचार दवरपाची जापसालदारकी ह्यो तळयो घेतात….. तळ्याचे सरभोंवतणी नेटान आणि झेतान चारय दिकांनी फांकिल्ली आनी सैमाचो अविश्कार दाखोवपी विंगड विंगड झाडां, पेडां आनी तांचो आदार घेवन वयर चडपी वाली… विंगड विंगड संवण्याच्या रडपा- खिदळपाचे तळ्यार घुमपी आवाज संवेदनशील मनांक पिशें लायतात. तानेल्ले रानदुकर, गवे दनपारच्या वेळार ना जाल्यार तिन्नसनां उदक पिवपाक तळ्यार भिरीं करतात.
श्रावण म्हयन्यांत जेन्ना धर्तरी नवे व्हंकले सारकी सजुन धजुन पाचवीचार जाल्ली आसता….. वत आनी पावसाचो आपा- लिपांचो खेळ सुरु आसता… तेन्ना मळब भरुन येतकुच मोराचे बेधुंद जावन नाचप अणभवपाक मुजरत ह्या तळ्यार येवन बसचें …निळसर मळबांत शिरवणांत चलिल्ली इंद्रधनुष्याची सात रंगांची उधळण पळयतलो जाल्यार तळये इतली बरी सुवात खंयच ना! वताचो आपा- लिपांचो खेळ, उटंगाराचो पावस, जगलां अणभवपाक ह्यो तळयो तुमकां पावसा दिसांनी आपोवणें धाडटात.
अशें म्हण्टात की ह्या उदकांत वखदाचे गुण आसतात आनी ताकाच लागून न्हाण घेतकुच मनशाक एकदम ताजें- तवाने दिसूंक लागता…. थाकाय एकदम पयसावता !! ह्यो तळयो म्हणल्यार सैमाचो वेगळावं नज असो वांटो.
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
