भांगरभूंय | प्रतिनिधी
फोंडें: वारखंडे- फोंड्यां पिकनिकेक वचपी प्रवाशी बस फातर लागिल्ल्यान तळयेंत कोसळपा पासून वाटावली. ही घडणूक आयतारा 24 मार्चाक सकाळीं घडली. बस चालक हॅण्ड ब्रेक ओडी नासतना खाला देंवले उपरांत बस सरळ सुमार 50 ते 60 मिटर फुडें वचून रावली. चालकान बशींत चडपाचो यत्न केलो, पूण देंवती आशिल्ल्यान ताका येस आयलें ना. मेळिल्ले म्हायती प्रमाण जीए 08 व्ही 8798 नंबराची बस वेर्णें कंपनीच्या कामगारांक घेवन उसगांव वाठारांत पिकनिके खातीर वताली. वारखंड्यां कांय कामगारांक घेवचे खातीर चालकान हनुमान तीर्थ तळी लागसार बस थारायली. कामगारांचें साहित्य बॉक्सांत घालचे खातीर चालक बशींतल्यान खाला देंवलो, पूण हॅण्ड ब्रेक ओडूंक नाशिल्ल्यान बस देंवतेर फुडें वचपाक लागली. बस फुडें वता तें पळोवन चालकान बशींत चडपाचो यत्न केलो, पूण बस नेटान मुखार गेल्ल्यान चालक रस्त्याचेर पडलो. बस सरळ मुखार वचून हनुमान तीर्थ तळये लागसार रस्त्याचे कुशीक आशिल्ल्या फातराक आडकून रावली. ह्या वेळार बशींत पिकनिकेक वचपी खूबशे कामगार आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
