भांगरभूंय | प्रतिनिधी
घरकार पुलिशेक शरण; रस्त्याचेर घडलो प्रकार
भांगरभूंय । प्रतिनिधी
दिवचल : रोलींग मिल्स दिवचल वाठारांत न्यू वाड्यार घरकारान तरसादीन वार करून घरकान्नीचेर हल्लो केल्ल्यान घरकान्नीक मरण आयलें. ही घडणूक शुक्रारा रोलींग मील दिवचल ह्या रस्त्याचेर घडली.
हे संबंदांत दिवचल पुलिसांनी तपासाक गती दिली. हल्लो कित्या खातीर केलो हाचे फाटलीं कारणां सोदतात. हल्लो केले उपरांत घरकार पुलीस स्टेशनार दाखल जालो. ताका पुलिसांनी अटक केली.
मेळिल्ले म्हायती प्रमाण नुसार रुबिया हावंगी (24) दुचाकी वयल्यान भुरग्यांक ट्युशनाक सोडपाक गेल्ली. त्या वेळार घरकार मैनिद्दीन हावंगी (32) रस्त्याचेर आशिल्लो. रोलींग मील मुखार आशिल्ल्या रस्त्याचेर ताणें घरकान्नीचेर तरसादीन वार केले. तातूंत ती गंभीर जखमी जाली. दिवचल हॉस्पिटलांत तिका हाडली तेन्ना तिका मरण आयिल्ल्याचें दोतोरांनी घोशीत केलें.
ह्या वेळार घरकार पुलिशेक शरण आयलो. घरांतल्या झगड्यांतल्यान हो प्रकार जाला, असो दुबाव आसा. ह्या प्रकरणांत विवीध कोनांतल्यान पुलीस तपास करतात. मरण आयिल्ल्या रुबिया हिका दोन ल्हान भुरगीं आसात, अशें कळ्ळां. दिवचल पुलिसांनी पंचनामो करून कूड पोस्टमार्टमा खातीर जीएमसींत धाडल्या, अशें सांगलां. विजय राणे हांच्या मार्गदर्शना खाला तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
