भांगरभूंय | प्रतिनिधी
हालींच कॉलेजींत वचपी विद्यार्थ्याचेर अॅसीड हल्लो जालो आनी ह्या हल्ल्यान सगलें गोंय सामकें हालयलें. गोंयभरांतल्यान वेगळ्या वेगळ्या थरा वयल्यान लोकांच्यो वेगळ्यो वेगळ्यो प्रतिक्रिया आयल्यो. राजकी फुडाऱ्यांनी गोंयांतल्या कायदो आनी सुवेवस्थेचेर सरकाराचेर बोट दवरलें, आनी तशें दवरप सहाजिकूच आशिल्लें. गोंयांत गुन्यांवकारी घडणुको वाडूंक लागल्यात, आनी ह्या सगल्या घडणुकांचे फाटभुंयेर लोकांनी सरकाराचेर टिका करप साहजिकूच आशिल्लें. उलयतल्यांचीं तोंडां हजार, एका विद्यार्थ्याचेर अॅसीड उडोवप ही गजाल गोंयांत तरी हाचे पयलीं केन्ना घडूंक नाशिल्ली, आनी लोकांची तिडक सहाजिकूच आशिल्ली.
गोंयांत नाका नाका ते घडूंक लागलां, आनी ही घडणूकय तशीच काळजाक हात घालपा सारकी आसा. त्या विद्यार्थ्याचे 50 टक्के आंग भाजलां म्हपणाचें लोकांक कळिल्लें. कोण तरी दुचाकी वेल्यान येता आनी विद्यार्थ्याचेर अॅसीड उडयता. ही स्टोरी सामकी क्रायम पेत्रोल वा सावधान ईंडीया कार्यावळींनी घडटा तशी. बातमी कळटकच गोंय पेटून उठिल्लें. सोशल मिडियाचेर तर ही बातमी वाऱ्या भशेन पातळिल्ली. व्हॉट्सअॅप ग्रुपांनी तर बातमेक लागून लोकांची तिडक दिसताली. ग्रुपांनी चर्चा चलिल्ली, गोंयांत हें घडटा तरी कितें…
टिव्ही चॅनलांनी आनी हेर खबरांपत्रांनी बातमी बरी उखलून धरली. हे सगले फाटभुंयेर हांवें गोंयाक भिवपाची गरज आसा असो लेख बरयिल्लो. मात सांजे स वरां मेरेन पुलिसांनी दुबाविताक अटक केली आनी ताणें आपणें अॅसीड उडयलां म्हूण मान्य केलां म्हूण कळ्ळें. आपणें बदलो घेवपाच्या कारणा वेल्यान केलां. आपणें अॅसीड मारिल्ल्याची दुबावितान कबुली दिली.
त्या दुबाविताची चली आनी त्या चल्याचो खंय मोग चलतालो. एक म्हयन्या पयलीं चलयेक मरण आयलें. ताच्या मरणाक हो चलोच जापसालदार आसा, असो दुबाव चलयेच्या बापायक आशिल्लो म्हूण ताणें अॅसीड मारलें. ताणें अॅसीड खंय तो काम करता त्या कंपनीतल्यान हाडिल्लें म्हणपाचें पुलीस चवकशेंत स्पश्ट जालां. हें सगलें वाचतकच मन सामकें सुन्न जालें.
हांवें चुकीचे पद्दतीन तर लेख बरयलो ना न्ही म्हणपाचो प्रस्न म्हाक पडलो. ल्हानाचे व्हड केल्ले धुवेचें मरण पळोवचें पडलें, आनी ते तिडकीन त्या बापायन हें तोंकाचें पावल उखल्लें. आतां चूक कोणाची, खरो कोण हें सगलें आमी न्याय देवतेचेर सोडुया, आयची तरणी पिळगी खंयचे वटेन चल्ल्या तांचे तांकांच खबर. आयची पिळगी शाणी जाल्या खरी, पूण नाका थंय चड तकली चलयतात. सोंपें भितर सगलें मेळपाक लागलां, कश्ट, काम, श्रम आयचे पिळगेक नाका जालां. तान भूक विसरून दीसभर मोबायल हातांत घेवन बसप हें आयचे पिळगेचें मुखेल काम. आमगेर- तुमगेर हेंच चल्लां.
तरणी पिळगी वाट चुकता, आनी अश्यो घडणुको जाल्यो की थोडे दीस लोक उलयतात आनी रोखडेच विसरतात. जेन्ना अशें नाका जाल्लें घडटा तेन्ना मात खरें दुख्ख जाता तें आवय- बापायक. शिकात, व्हडले मनीस जायात, जीण ही एकदांच मेळटा ती अशी व्हगडावं नाकात, आनीक कोण आसूं नासूं आवय- बापूय तरी आसा हें तुमी विसरूं नाकात. नाका जाल्ले करचें पयली तांचे विशीं चिंतात, ते कशे कश्ट करतात तुमचे खातीर. दीस- रात वावुरतात, स्वताक कमी करून तुमकां दितात. शेवट अशें कितेंय घडलें जाल्यार कितें तीं बाबडीं पळयतलीं, आनी मागीर कोणाच्या नांवान रडटलीं… आनी कोणाक पळोवन जियेतलीं. चूक कोणाची आनी भोगता कोण.
सिमी गांवकार
9158544966
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
