भांगरभूंय | प्रतिनिधी
पणजी: ‘नवी पहल’ ही गोंयांतल्या तरणाट्यां लेखकांक प्रोत्साहन दिवपा खातीर गोंय राजभवनाची पुरस्कृत येवजण आसा. जे लेखक आपलें पयलें पुस्तक कोंकणी, मराठी, संस्कृत आनी हिंदी भाशेंत प्रकाशीत करपा खातीर यत्न करतात तांकां सहकार्य करपाक ही येवजण आसा. प्रकाशित जावपी पुस्तक काल्पनीक, नॉन फिक्शन, कविता, चरित्र, आत्मचरित्र, प्रवासवर्णन, काव्यसंग्रहाचेर आसचें.
हे येवजणे खातीर राजभवनान अर्थीक तजवीज केल्या. अश्या लेखकांक तांचें पयलें पुस्तक प्रकाशीत करपा खातीर मदत करपाची राजभवनाची इत्सा आसा.
राजभवनान स्थापन केल्ली समिती हे येवजणे खाला पयल्या 60 लेखकांची निमाणी नेमणूक करतली. हे येवजणे खाला 25 कोंकणी, 25 मराठी आनी 10 पुस्तकां हिंदी आनी संस्कृत भाशेंत प्रकाशीत करपाचो प्रस्ताव आसा.
ज्या लेखकांक राजभवनाचे हे येवजणेचो लाव घेवपाचो आसा, तांणी आपले अर्ज लेखकाचो बायोडेटा, पुस्तकाच्या मसुद्याच्यो प्रती सयत पुराय तपशीला वांगडा राज्यपालाचे विशेश अधिकारी, राजभवन, दोनापावला, गोंय ह्या नाम्याचेर 15 दिसां मजगतीं वा 10 मार्च 2023 पयलीं पोस्टातल्यान वा स्वता हाडून सुपूर्द करचे. पुस्तकांत राष्ट्र, राष्ट्रीय धोरण, राष्ट्रीय नेते हांचे आड वा खंयचोय धर्म, जात, पंथ आदींची भावना दुखोवपी मजकूर आसपाक जायना.
चड म्हायती खातीर तुमी राजभवनाच्या www.rajbhavan.goa.gov.in ह्या वेबसाइटीक भेट दिवची, अशें कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
