भांगरभूंय | प्रतिनिधी
बेकार जिणे पद्दत, ताण आनी आनुवंशिकतायेक लागून तरणाट्यां मदीं संधिवाताची समस्या वाडत आसा. वेळार निदान, जिणें पद्दतींत बदल, फिजियोथेरपी आनी उण्यांत उणी आक्रमक प्रक्रिया सारकिले प्रगत उपचार दुयेंतींक सक्रिय जिवीत जगपाक मदत करतात. संधिवात आतां फकत जाण्ट्यां पुरतो मर्यादीत ना. 20 ते 50 वर्सां पिरायेच्या लोकांकय संधिवात जाल्ल्याचें निदान जावपाक लागलां आनी दुयेंतींचो आंकडो वाडत आसा. जायते तरणाटे दुयेंती सांध्यांत घटसाण वा सूज येवप अशा सुरवातेच्या लक्षणां कडेन आडनदर करतात, पूण फुडाराक तांकां दीर्घकाळाच्या दुखण्याक तोंड दिवचें पडटा.
दर म्हयन्याक उपचारा खातीर ओपीडींत दाखल जावपी 10 लोकां मदल्या 4 जाणांक संधिवाता कडेन संबंदीत सांध्यांचें दुखप आनी सूज येवपाचीं लक्षणां दिसतात. एकेच सुवातेर बरोच वेळ बसप, व्यायामाचो उणाव, बसपाची मुद्रा चुकीची, जखमी जावप, स्थूलताय, ऑटोइम्युन स्थिती, कुटुंबीक इतिहास आनी ताण हीं हे स्थितीक योगदान दितात. सांधे घट जावप, दुखप, सुज येवप, उश्णताय येवप, हाडांची सहजताय ना जावप, थकप हीं लक्षणां दिसतात. संधिवाताचेर आडनदर केल्यार दीर्घकाळ दुखप, सांध्यांची विकृतताय, अपंगत्व आनी जिणेचो दर्जो उणो जावं येता. नेमान व्यायाम, वजन नियंत्रण, ताण वेवस्थापन अशे तरेचे जिणे पद्दतींत बदल केल्यार ह्या दुयेंसाची वाड जावची ना.
संधिवाताचे प्रकार
ऑस्टियोआर्थराइटिस (Osteoarthritis) : हो संधिवाताचो सगळ्यांत चड प्रमाणांत दिसपी प्रकार. ताका लागून सांध्यांतली कूर्चा घसघशीत जाता आनी हाडां एकामेकांक घसघशीत जातात.
रुमेटाईड अर्थरायटीस (Rheumatoid rthritis) (RA): हातूंत कुडीची रोगप्रतिकार शक्त सांध्यांच्या आवरणाचेर हल्लो करता. ताका लागून सांध्यांत सुज, दुखप, घटसाण येता. ताचीं लक्षणां चड करून सकाळीं दिसतात.
सोरायटिक संधिवात (Psoriatic Arthritis) : हो सोरायसीस (Psoriasis) नांवाच्या त्वचेच्या रोगा कडेन संबंदीत आसा. हातूंत सांध्यां वांगडा कांतीचेरूय परिणाम जाता.
गाऊट (Gout) : हो एक दुखणें दिवपी संधिवात जावन आसा. जो रगतांत युरीक ऍसिडाचें प्रमाण वाडिल्ल्यान जाता. हें युरिक ऍसीड क्रिस्टल्स सांध्यांत जमा जाल्ल्यान दुखता आनी सूज येता.
भुरग्यां मदलो संधिवात (Juvenile Idiopathic Arthritis – JIA) : हो ल्हान भुरग्यां मदीं मेळपी संधिवात जावन आसा. हाचीं लक्षणां 16 वर्सां पिराये पयलीं दिसतात आनी आयुश्यभर तिगून रावपाक शकतात.
योग्य जिणे पद्दतींत बदल
नेमान व्यायाम: चलप, योग, पेंवप वा ताणप सारक्या सौम्य व्यायामाक लागून सांध्यांत घसाण उणी जाता आनी सांध्यांक हालचाल करपाक सोंपें जाता.
समतोल आहार: ओमेगा-३ फॅटी ऍसिड भरपूर आशिल्लें जेवण घेवचें, तातूंत नुस्तें, अक्रोड हांचो आस्पाव जाता. साकर, फास्ट फूड आनी प्रोसेस्ड फूड्स टाळचें.
वजनाचेर नियंत्रण दवरप: चड वजनाक लागून सांध्यांचेर ताण पडटा. देखून संधिवात नियंत्रीत करपाखातीर वजनाचेर नियंत्रण दवरप हें सगळ्यांत म्हत्वाचें पावल.
ताण नियंत्रण: ध्यान, प्राणायम आनी फावो ती न्हीद घेवप ताण उणो करपाक मदत करता.
वखदां आनी फिजियोथेरपी: दोतोराच्या सल्ल्या प्रमाण फावो तीं वखदां आनी फिजियोथेरपी घेतल्यार संधिवाताची तीव्रता उणी जावंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
