भांगरभूंय | प्रतिनिधी
नवी दिल्ली, खबरां संस्था ः वाडत वचपी मोटसाण आनी चड साकर आनी चरबी आशिल्लीं प्रक्रिया केल्ली खाणां (जंक फूड) हांचो वापर वाडपाचो हुस्को उक्तायतना अर्थीक सर्वेक्षणाच्या अहवालांत देशांतल्या वट्ट दुयेंसांतले 54 टक्के दुयेंस वायट आहाराच्या सेवनाक लागून जाता अशें सांगलां.
देशांतल्या कार्यक्षम पिरायेच्या लोकां मदीं वायट आहार आनी वायट वागणूक सवयींचो घातक संयोजन भौशीक भलायकी आनी उत्पादकताय उणी करुंक शकता. इतलेंच न्हय तर भारताचे अर्थीक तांकीचें लुकसाण जावं येता अशी शिटकावणी अहवालांत दिल्या.
जंक फूडाच्या सेवनांत वाड, शारिरीक क्रियाकलाप उणो जावप, समतोल आहाराची उणीव, मोटसाण समस्या आदी तरणाट्यांक घातक थारता अशें अहवालांत म्हणलां.
मानसीक भलायकेचेर लक्ष दिवपाची गरज
पयलेच खेपे अर्थीक सर्वेक्षणाच्या अहवालांत मानसीक भलायकेच्या विशयाचेर व्यापक आनी सविस्तर रितीन चर्चा जाल्या. समाजांतल्या मानसीक भलायकेचेर लक्ष दिवप हें भलायकी आनी अर्थीक दोनूय नदरेन गरजेचें आसा अशें अहवालांत म्हणलां. मानसीक भलायकेचो वायट परिणाम मनशाचे शारिरीक भलायकेपरस उत्पादकतायेचेर चड जाता अशें तातूंत नोंद केलां. राष्ट्रीय मानसीक भलायकी सर्वेक्षण 2015-16 च्या आंकड्यांचो उल्लेख करून भारतांतल्या 10.6 टक्के प्रौढांक मानसीक विकार आसात अशें अहवाल सांगता. जाल्यार ताचेर उपचार नाशिल्ल्या मानसीक विकारांचें प्रमाण 70 ते 92 टक्क्यां मदीं आसा अशेंय ह्या अहवालांत नोंद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
