कावळो आफुडिल्ली अस्तुरी व्हडा प्रमाणांत बाजार, शॉपिंग करतनाच शाळा, कार्यालय आनी हेर सगल्या मळांचेर वचून दादल्यां बराबरीन काम करता. उत्सवांनी तिणें वांटो घेतल्यार कोणाक कळचें पसून ना. सॅनिटरी नॅपकिन्सांच्या उद्येगान केल्ली क्रांती पळयल्यार ती ब्रह्माडांत कावळो आफुडिल्ले स्थितींतय वचूंक शकता. कावळो आफुडप हो तर अस्तुरेचो निसर्गधर्म, कावळो आफुडचे आदीं, उपरांत त्रास जातात हें खरें, तेंच बाळंटेराचेंय. बाळंटेर, कावळो आफुडपाचे सुटयेची नवी अस्तुरीनीत केंद्र सरकाराच्या अस्तुरी आयोगान भासाभास करून थारावची पडटली.एल अँड टी कंपनीचे अध्यक्ष एस एन सुब्रमण्यम हांणी आपल्या कंपनींतले अस्तुरेक पगारा सयत कावळो आफुडटकीच एका दिसाची सुटी दिवपाची आंतरराष्ट्रीय अस्तुरी दिसा निमतान खबर दिली. उद्येगसमुहाचे इंजिनियरिंग, कन्स्ट्रक्शन कंपनींतल्या अस्तुरे खातीर हो निर्णय घेतला. अभ्यास केलो, भासाभास केली तेन्ना आनीकय कांय कंपनींनी, राज्यांनी तशेच तरेची सुटी दिवप सुरू केलां अशी म्हायती मेळ्ळ्या. कावळो आफुडपाचे सुटयेची नीत संवसारांत कशी आसा? देशांतले अस्तुरेचेर कावळो आफुडटकीच वावरांत राविल्ले वेळार कितें परिणाम जातात ताचो अभ्यास राष्ट्रीय अस्तुरी आयोगान करचो पडटलो, एक सारकी नवी नीत करपाची गरज आसा.उद्येगीक कंपनींनी देशांत अस्तुरेचें बळगें कशें खंय वाडटा? तिका बराबरीन व्हरतात? तिचे पासत मेकळें वातावरण आसा? तिका सुटी घेवपा पासत फ्लेक्सीबिलीटी आसा? हे विशीं अभ्यास करून, भासाभाशेंतल्यान नीत जावची. अस्तुरीनिती, धोरण थारावप आनी ती चालीक लावपच ना अशेंय कंपनीं, उद्योगांनी घडटा आसूंये. अस्तुरीनीत कामगार कायद्यांनी मुखेलपणान हाडची पडटली. अस्तुरी कितल्याशाच उद्येगांनी रातपाळयेचेर वावुरता तेन्ना तिका राखण मेळटा? रातपाळयेंत वावुरपाक तिका आवडटा? दीसभर, रातपाळयेंत वावुरपी अस्तुरे पासत कावळो आफुडपाची सुटी म्हयन्याक दोन दीस तरी मेळपाक जाय.एल अँड टी कंपनीच्या अध्यक्षांनी घेतिल्लो निर्णय बरो. फाटल्या दिसांनी सप्तकाक णव्वद वरां कामकाजाचो विशय तांणी मांडलो, घरकान्नीच्या तोंडा कडेन आयतारा दीसभर पळयत रावतले? अशें उलोवन वाद केलो, तांचेर टिकाय जाली. मागीर कळ्ळें उद्येगाच्या शेअर बाजाराचें गणीत कंट्रोवर्सींत लिपिल्लें. व्हड उद्येगांतले कर्मचारी कंपनींनी शेअरहोल्डर्स आसतात. उंचेलें शिक्षण घेतिल्ल्या उत्कृश्ठतायेक उद्येग सोदून, आपोवन व्हरतात, अस्तुरेक उद्येगांनी मल्टीटास्कर जावचें पडटा, अणभवापरस नोकरेंत तिगून रावपाक आयज म्हत्व आयलां. साबार कंपनींतल्या अस्तुरेक बराबर घेवन एल अँड टीच्या अयोध्येचें राम मंदीर बांदपा पासत केल्ल्या वावराची केंद्र सरकार आयज ना फाल्यां तोखणाय करतलें हातूंत दुबाव ना. उत्तर प्रदेशाक पर्यटन उद्येग वाडोवपाक, नामना जोडपाक राम मंदिराचो वांटो आसा. अजून प्रकल्पाचो वावर पुराय जावपाचो आसा. राम मंदिराची भोंवतण पांचवीताल्ल करपाची मोख उत्तर प्रदेश सरकाराची. तातूंत कितल्याशाच उद्येगपतींचो आसपाव आसतलो मालकी सरकाराची, ट्रस्टाची.अस्तुरे विशींच्या नवे बाळंटेराचे सुटयेचें, चायल्ड केअर सुटयेच्या नितीचें गणीत व्हड आसा. धा वर्सांपयलीं केंद्र सरकारान नवीं पावलां मारलीं, नवें धोरण जालें. जैत कितलें मेळ्ळां? 75 वर्सांचें कामगार कायदे बदलून तातूंत विंगड विंगड रुपांतली अस्तुरी दिसतली हे पासत यत्न अस्तुरी आयोगाक करचे पडटले. बाळंटेराची सुटी तीन वर्सां मेरेन वाडोवपाची गरज आसा ? अस्तुरेचे विचार कितें आसात तें समजून घेवन नवी नीत जावची. भुरगेपणांत आवय घरा जाय तितलीच भुरगीं व्हड जातनाय हें सत. आवयक घरा रावनय करपासारके उद्येग आसात, लाडू, चिवडो, मसालो, लोणचीं पापडांतल्यान भायर सरून, तीं करून. ऋतुमाना नुसार उद्येगाचें रुप बदलूंक येता. एका तेंपार लाडू, चिवडो, चकरी उत्सवांवेळार दिसताली आतां ती सदांय जाता. स्वयंपूर्णा अन्न प्रक्रिया उद्येगांतल्यान गोंयची अस्तुरी कितली जैतवंत जाल्या? मार्केटिंगाची कुशळटाय, पोशक अन्नाचें म्हत्व तिका खबर आसा हाचो सर्वे राज्यांत जावंचो. गृह आधारांतल्यान स्वयंपूर्णा जाल्ली अस्तुरी करोडपती जावपाचे वाटेर आसा ? गोंयच्या मुखेलमंत्र्यांनी आपले घरकान्नीचे, अस्तुरी आमदारांचे, आयोगाचे मजतीन स्वयंपूर्णेची नवी नीत ठरोवची, देशाकय ती उपेगी ठरुंक येता. आदल्यो एफडीएच्यो संचालक ज्योती सरदेसाय हांणी सेवेच्या निमण्या वर्सांनी केल्ल्या कामकाजाची तुस्त देशान केली. कावळो आफुडलो, बाळंटेराच्या सुटयेची देशांतली नवी नीत थारावपांत तांणी, तांच्या सारक्या बायलांनीय विचार मांडपाक जाय, सरकारी वावरांत आशिल्ले अस्तुरेक नवी दिका मेळपा पासत. कामकाजांत खासगी, सरकारी आशिल्ली अस्तुरी निमणे आवय, भयण, घरकान्न आसता हें ती विसरना, विसरचीय ना.
सुहासिनी प्रभुगांवकार9881099260
भांगरभूंय | प्रतिनिधी
पणजी : सध्याचे तरणाटे पिळगे मदीं ज्येश्ठ नागरिकां विशीं सहानुभूती निर्माण करप गरजेचें आशिल्ल्याचें मत समाजकल्याण संचालक अजित पंचवाडकर हांणी उक्तायलें.मंगळारा व्ही एम साळगांवकार महाविद्यालया वतीन आयोजीत केल्ले कार्यावळींत पंचवाडकर हे उलयताले. ह्या वेळार प्राचार्य डॉ. शबेर अली, सहाय्यक प्राध्यापिका रुचिरा नायक, क्रॉप संस्थेची संचालिका डॉ. संध्या राम, इरम खत्री आनी हेर हजर आशिल्ले.ज्येश्ठ नागरिकां खातीर सरकार काम करता. कांय एनजीओ ज्येश्ठ नागरिकांक तांच्या अधिकारां विशीं म्हायती दिता. जाल्यार कांय सुवातांचेर ज्येश्ठ नागरिकांची काळजी घेवपाचें काम जाता. हीं सगलीं कामां करप गरजेचें. मात मुळांत जंय कर्तव्याचो उणाव आसा थंयच अधिकाराची जाणीव करून दिवची. म्हळ्यार एका अर्थान अधिकार ही संकल्पना नकारात्मकूय आसा, अशें तांणी मुखार म्हणलें.ज्येश्ठ नागरिकांक तांच्या अधिकारांची म्हायती दितनाच आमी तरणाट्यांक तांचीं ज्येश्ठ नागरिकांक प्रती आशिल्लीं कर्तव्यां कितें आसात, हेंय समजावन सांगपाक जाय. हाका लागून एनजीओंनी वा महाविद्यालयांनी तरणाट्यां मदीं जागृती करपाक जाय. गोंयांत भलायकी सुविधा बर्यो आशिल्ल्यान वयोमान वाडटा. सध्या गोंयांत सुमार ११ टक्के लोकसंख्या ज्येश्ठ नागरिकांची आसा. फुडाराक ज्येश्ठ नागरिकां खातीर सगल्यांक खूब कामां करचीं पडटात.डॉ. संध्या राम हांणी, क्रॉप संस्थे वतीन महाविद्यालयांतल्या विद्यार्थ्यांक ज्येश्ठ नागरिकांचे अधिकार, तांचे विशींचे कायदे हे विशीं म्हायती दितात. हाची सविस्तर म्हायती आशिल्ली पुस्तिका आयज प्रकाशीत केल्या. हातूंत भलायकी, देखभाल, मालमत्ता हस्तांतरण अधिकार, राज्य सरकाराच्यो ज्येश्ठ नागरिकां खातीर आशिल्ल्यो विवीध येवजण्यो अशी जायती म्हायती दिल्या. ही पुस्तिका चडांत चड ज्येश्ठ नागरिकां मेरेन पावोवपाचो आमचो यत्न आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
March 19, 2025
March 18, 2025
