भांगरभूंय | प्रतिनिधी
पयलीं काळजाच्या दुयेंसा विशीं एक पिरायेची मर्यादा आशिल्ली. सादरण पिराय 60 वर्सां उपरांत ह्या दुयेंसाचें प्रमाण चड आसतालें. पूण फाटल्या कांय वर्सांत 30 ते 50 वर्सां पिरये गटांत काळजाच्या दुयेंसाचें प्रमाण व्हड प्रमाणांत वाडलां. कारण फाटल्या कांय वर्सांनी दरेक मनशाचे रावपाचे पद्दतींत, खावपाचे पद्दतींत खूब बदल जाला. तातूंत भर म्हूण सोरो, तंबाकू, घुंवळे वखदां सारकीं वेसनां हाका लागून दीसपट्टे शैलींत बदल जाल्ल्याचें दिसून आयलां. पंजाबांतल्या फिरोजपूरांत गुरुहर सहाय ह्या मैदानार 29 जून 2025 दिसा हरजीत सिंग नांवाचो तरणाटो क्रिकेट खेळगडो बॅटींग करतना ताणें सको हुबयलो, पूण अचकीत ताका काळजाचो आताक आयलो आनी थंयच तो पडून ताका मरण आयलें. ही धक्को दिवपी गजाल. हाका लागून सगल्यांचे काळीज हळहळून आयलें आनी खेळगड्यां मदीं दुख्खाची सया पातळ्ळी.
हाचे पयलींय मुंबयंत जून 2024त क्रिकेट मॅची वेळार राम गणेश तेवर नांवाचो खेळगड्यान सको हुबयले उपरांत काळजाचो आताक आयलो आनी क्रिकेट खेळटना अशीच काळजाक पीळ घालपी घडणूक घडली. ह्या 42 वर्सां पिरायेच्या खेळगड्याक मरण आयलें. 2024 वर्सा अशेच तरेन पुण्यां गरवारे स्टेडिमांत इमरान पटेल नांवाचो 35 वर्सां पिरायेच्या खेळगड्याक क्रिकेट खेळटना काळजाचो आताक येवन मरण आयलें.
हाचे वेल्यान स्पश्ट जाता की काळजाच्या दुयेंसाचें प्रमाण दिसान दीस व्हड प्रमाणांत वाडत आसा. ह्या दुयेंसाचीं कारणां खुबशीं आसूं येतात. मादक द्रव्यां सेवन, धुम्रपान, तंबाकू, गुटखा, सोरो हांचोय काळजाच्या आताकाचेर व्हड प्रमाणांत गंभीर परिणाम जाता आनी मुखार वचून ताचें मरणाचें कारण थारता. तेचप्रमाण मोबायलाचो चड प्रमाणांत वापर, वाडटो तणाव, अनियमीत जिणेशैली, दीसपट्टें फास्ट फुडाचें वाडटे प्रमाण, आहाराची देंवल्ली गुणवत्ता, वेळावेळार भलायकेची काळजी न घेवप, व्यायामाचो उणें प्रमाण, वाडटी मोटसाण बी खुबश्या गजालींचो परिणाम तरणाट्यां मदीं जायत आशिल्ल्यान काळजाच्या आताकाचो घात चड आसता.
तरणाट्यां मदीं काळजाच्या आताकांत भर घाल्या ती गोडेंमूत, अती प्रमाणांत रक्तदाब हाचो सरळ प्रभाव काळजाच्या दुयेंसाचेर जाता. ह्या दुयेंसाचें मुखेल करण म्हणल्यार मसालेदार पदार्थ, ऑयली फूड, फास्ट फूड, चड प्रमाणांत कोल्ड्रिंक्स पियेवप आनी मिठाय हाका लागून गोडेंमुताचें प्रमाण वाडून सरळ काळजाच्या दुयेंसाचेर जाता वा जावंक शकता. कांय वेळार काळजाच्या दुयेंसाचे अनुवंशीक लेगीत आसूंक शकतात. ताका लागून कुटुंबांत कोणाकूय काळजाचें दुयेंस आसत जाल्यार हेरांनी सादूर रावप गरजेचें आसा.
हालींच्या दिसांनी तरणाट्यां मदीं शारिरीक कामां उणीं जातना दिसून येतात. घरांतल्यान काम केल्ल्यान खुबशे जाण वराचीं वरां भोंवनासतना काम करीत आसतात. वेळ मेळूंक नाशिल्ल्यान ते भलायकेची तपासणी टाळटात. ताका लागून तरणाट्यां मदीं बीपी, शुगर, कोलेस्ट्रॉल हांच्या प्रमाणांत वाड जायत आसता. निमाणे काळजाचो आताक येवपाचो संभव आसता.
पयलीं कुटुंबीक वातावरण शांत आशिल्लें. कोरोनाच्या काळांत दरेक घरा कणकणीं कामांत व्यस्त आशिल्ल्याचें दिसून येतालें. मिनी ऑफिसां बदलत आसात. घरा कडल्यान काम करीत आशिल्ल्यान विसव घेवपाची संद ना. ताका लागून तरणाट्यां मदीं मानसीक ताण तशेंच चेंपण आसता. कुटुंबीक, अर्थीक समस्या, नोकरेंतली असुरक्षीतताय, वेवसायीक संबंद तुटप बी ह्या कारणांक लागून मानसीक विकार वाडटात. हो मानसीक ताण काळजाच्या आताकाचें एक कारण आसा.
रक्तवाहिन्यांचें गंभीर लुकसाणाक लागून लेगीत काळजाचो आताक येवंक शकता. तशें केलें ना जाल्यार रक्तवाहिन्यो फुटप वा फुटप हो एक दुर्मीळ परिणाम आसा. हाची नेमकीं कारणां सांगूंक येवची नात. दादलो आनी बायल ह्या दोगांकूय हाचो घात आसा.
निकृश्ट दर्ज्याच्या आहाराक लागून कुडींत पेड्डेर कोलेस्ट्रॉल जमा जाता. व्यायामाच्या उणावाक लागून बरें कोलेस्ट्रॉल उणें जाता. त्या प्रमाणांत वायट कोलेस्ट्रॉल वाडटा आनी काळजाचेर ताण येता. कोलेस्ट्रॉलाची पातळी फक्त रगत तपासणी वरवीं निर्धारीत जावंक शकता. फक्त मोटसाण लोकां मदींच कोलेस्ट्रॉल चड आसता हो एक समज आसा. सडपातळ लोकां मदींय उंचेलो कोलेस्ट्रॉल आसूंक शकता. ताका लागून तुमचें कोलेस्ट्रॉल नेमान तपासप गरजेचें. तशेंच जेवणांत लेगीत बदल गरजेचो आसता.
तशेंच सद्याच्या धांवपळीच्या जिणेशैलीक लागून आनी वाडट्या प्रदुशणाक लागून लेगीत काळजाचें दुयेंस दिसून येता. आमी पळयत आसतात की सद्याचे परिस्थितींत खूबशे अभिनेते, गायक, हास्य कलाकार आनी निर्देशक हांचो काळजाच्या आताकान मरण आयिल्ल्याचें आमी पळयलां. हातूंत पिरायेची मर्यादा 30, 40, 50 वर्सां. अशे तरेन उणी पिराय आसा. हे पिरायेंत काळजाचो आताकान मरण जायत आसत जाल्यार ही गजाल हुस्को करपा सारकी आनी गंभीर आनी धक्को दिवपी आसा. ताका लागून वाडटीं काळजाचीं दुयेंसां वा हेर दुयेंसां पळयत जाल्यार सगल्यांनीच आपले भलायकेची जतनाय घेवप सामकी गरजेची.
काळजाचो आताक कसो टाळूं येता हे थोडे भितर सांगपाचें म्हणल्यार धुम्रपान करूं नाकात, ताजीं फळां आनी भाज्ज्यो खावच्यो, गोडसाण, मीठ आनी तूप उणें करचें, मटणाचो प्रकार उणो करचो, एरंडेल तेलान तयार केल्ले पदार्थ टाळचे, प्रक्रिया केल्ले आनी पॅकेले केल्ले पदर्था खावचे न्हय, वजन वाडचें ना हाची जतनाय घेवची. सद्दां दीसपट्टे 30 मिणटां चलचें, जॉगींग वा पेंवप गरजें आसा. सप्तकांतल्यान पांच दीस व्यायाम करप गरजेचें आसा. गोडेंमूत, कॉलेस्ट्रॉल नियंत्रणांत दवरप, वेळावेळा रक्तदाब तपासप, अचकीत व्यायाम आनी चड शारिरीक कश्ट टाळप, योग आनी ध्यान हो सदचो दीसपट्टो भाग आसचो.
तरणाट्यां मदीं काळजाच्या दुयेंसाचो वाडटो घात हो हुस्क्याचो विशय आसा. जिणेशैलींतल्या बदलाक लागून हें दुयेंस घातक थारत आसा. ताका लागून तरणाट्यांनी आपले भलायके कडेन लक्ष दिवप गरजेचें आसा. नेमान भलायकेची तपासणी, निरोगी जिणेशैली आनी दोतोरांचो सल्लो घेवन काळजाच्या दुयेंसाचो घात उणो करूं येता.
रमेश कृष्णराव लांजेवार
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
