भांगरभूंय | प्रतिनिधी
गोंयांत घुंवळे वखदां धरलीं, ह्या माथाळ्याची खबर छापून येवप ही आतां नविदाद उरूंक ना. निरक्षराकूय माथाळो पळोवनूच ही ड्रग्सा संबंदीत बातमी हें कळपाक लागलां. सरकारान फाटीं घुंवळे वखदांचें सेवन आनी तस्करी आड खर पावलां उबारपाची घोशणा केल्ली. ती चालीक लागल्या, अशी आस्त बाळगुपाची? फाटल्या णव म्हयन्यांनी कितलें ड्रग्स धरलें आनी कितल्या गुन्यांवकारांक अटक केली, ताची म्हायती गोंय पुलिसांनी दिल्या. हुस्को करपाची गजाल म्हणल्यार, घुंवळे वखदां वेव्हारांत अटक केल्ल्यांची पिराय सरासरी 30 वर्सां आसा !!! ही खबर गोंयच्या पालकांची झेम उडयतली, हे विशीं कोणाक दुबाव नासचो. सरकारी यंत्रणेक हाचें सोयर, सूतक आसतलेंच अशें ना, मात समेस्त गोंयकार घराबे उध्वस्त करपी अंश हे खबरेंत आसा.
21 ते 30 वर्सां पिराय गटांत 67 तस्करांक (ड्रग्स हाडपी, विकपी) धरल्यात. 31 ते 40 वर्सां पिराय गटांत 28 सांपडल्यात. इतलेंच न्हय तर 18 ते 20 पिरायेच्या 7 जाणांक धरल्यात. शिकपाचें, नोकरी करपाची, स्वताच्या पांयांचेर उबे रावपाचें, लग्न करून जिणेंत थीर जावपाचें पिरायेचेर हें तरणाटे कितें करतात, तर घुंवळे वखदां विकतात आनी बंदखणींत वतात. स्वताच्या हातांनी पांयांचेर फातर मारून घेवपाचो हो प्रकार. 102 गुन्यांवांनी 114 जाणांक अटक केल्या. तातूंत 18 ते 40 वर्सां मदले 108 तरणाटे आसात. तांचे कडल्यान 3 कोटी 83 लाख रुपयांचें ड्रग्स जप्त केलां. म्हणटकच पयशां खातीर ते सकयल्या थरार गेल्यात. देश महासत्ता करपाची भास आमी उलयतना दुसरे कडेन तरणाटी पिळगी चुकीच्या मार्गाचेर वता तें पळोवन खऱ्या देशप्रेमी भारतीयाच्या मनाक घाय जाले बगर रावचे नात. लोकसंख्येचे तुळेन हो आंकडो उणो तरी तो खूब धोक्याचो आसा. हातूंत अटक जावंक नाशिल्ले वा पुलिसांक चुकिल्ले कितले आसतले, हाचो अदमास करचो.
1 जानेवारी ते 30 सप्टेंबर मेरेन अटक जाल्ल्या सगल्या घुंवळे वखदां तस्करां मदीं 62 गोंयां भायले आसात. तर 29 नीज गोंयकार तरणाटे. 23 विदेशी. गोंयकारांची टक्केवारी 25.43 प्रती शेंकडो. ती वाडत आसा. हाचे वयल्यान गोंयकारांनी कितें समजुपाचें तें समजुचें. हवा चराचरांत आसता, तशें ड्रग्स आतां राज्याच्या खांची- कोनशांनी मेळपाक लागलां. ह्यो वाऱ्या वयल्यो गजाली न्हय, तर खुद्द गांवगिरे पत्रकार, पुलिसांनी जाहीर उक्तायिल्ली खंत. समाज जागृत जाले बगर तरणाटी पिळगी पोखरपी हो रोटो नश्ट जावचो ना. पालकांनी लक्ष दवरचेंच, पूण तरणाट्यांनीय विचार करचो. मानान जगचें काय बदनाम जावन मरचें वा बंदखणींत कुसचें तें जाचें ताणें थारावचें. जगपाक पयसो जाय, पूण तो अश्या मार्गान मेळिल्लो न्हय. केंद्र सरकारान बेकारी पयस करपाक पावलां उबारल्यांत. 10 लाख नोकऱ्यो दिवपाचो निर्णय जाला. तातूंतल्यो कांय गोंयांकूय मेळटल्यो. दरेकल्यान आपले भितरली कुशळटाय विकसीत करून स्वताच्या पायांचेर उबें रावचें, हे खातीरुय यत्न चल्ल्यात. चुकीच्या मार्गाक लागिल्ल्या तरणाट्यांनी हाचेर विचार करचो.
हेर राज्यांच्या मानान गोंयांत राहणीमान खूब उंचेलें. जिणेगरजेची वस्तू घेतलो जाल्यार पसून बरोच दुडू मोडचो पडटा. तातूंत एकमेकां मदीं सर्त चलता. एकल्यान घरगुती सुवाळ्याचेर 2 लाख मोडले जाल्यार दुसरो 3 लाख खर्च करता. हें करपाक आलायतो पयसो जाय पडलो. तो जमोवपाक कायदो माड्डून वा चुकीचे मार्ग आपणावन बरेच लोक धंदो, वेवसाय, नोकरीय करतात. दुसरे वटेन गांवांतल्या लोकां मदीं, खुद्द कुटुंब- सोयऱ्यां मदीं पसून दुस्वासाचो वास येता. दुसरो, खास करून शेजारी अर्थीक नदरेन वयर सरिल्लो बऱ्याच जाणांक आवडना. मागीर ते एकतर ताचे पांय ओडटात वा ताचे परस चड गिरेस्त जावपाक धांवतात. ह्या वेळार थोडे चुकीचो, बेकायदेशीर मार्ग आपणायतात. तातूंतलो एक, घुंवळे वखदांची विक्री! फाटीं कांय राजकी फुडाऱ्यांचीं ड्रग्सा बाबतींत नांवां आयिल्लीं. पूण ते मनीस अस्तित्वांत नात, अशें फुडाऱ्यांनीच उपरांत जाहीर केलें. सांगपाचें म्हणल्यार म्हारगाय, राहणीमान, फटीची प्रतिश्ठा अशा साबार कारणांक लागून थोड्या दिसां भितर चड पयसो जोडपा कडेन सगल्यांचोच कल दिसता. हातूंतले कोण ड्रग्साच्या मळार आसात जाल्यार पुलिसांक सोद घेवन तांकां अटक करची पडटली. तांणी हाचेर विचार करचो…. आनी चुकिल्ल्या तरणाट्यांनीय उजू मार्गार येवपाचो!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
