तरणाट्यांनी स्वाभिमानान कोकणीचो वावर फुडें व्हरपाक जाय : दामोदर मावजो

भांगरभूंय | प्रतिनिधी

शणै गोंयबाब जिवीत आनी बरप परिसंवाद कार्यावळेक सुरवात

पणजी, प्रतिनिधी : कोंकणीभाशक लोक हे गोंयां पुरते मर्यादीत नासून ते हेर राज्यांनीय आसा. तरणाट्यांनी स्वाभिमान बाळगून कोंकणीचो वावर मुखार व्हरपाक मुखार सरचें, असो उलो ज्ञानपीठ पुरस्कार जैतिवंत साहित्यीक दामोदर मावजो हांणी मारला.
साहित्य अकादेमी, गोवा कोंकणी अकादेमी आनी बालभवन आयोजित ‘शणै गोंयबाब जिवीत आनी बरप’ ह्या विशयावेल्या दोन दिसांच्या परिसंवादाचें आयज उक्तावण जालें. उक्तावणाच्या भाशणांत श्री. मावजो हांणी हें वक्तव्य केलें. आयज आनी फाल्यां आयतारा अशें दोन दीस हो परिसंवाद जातलो. कार्यावळींत अॅड. उदय भेंब्रे हांचे मुखेल भाशण जालें.

शणै गोंयबाब हे सामाजिक प्रबोधनकार आशिल्ले. शणै गोंयबाब हांचें जिवीत आनी कार्य जनमानसांत जितले पावपाक जाय आशिल्लें, तितलें ते पावूंक ना, अशी खंत मावजो हांणी उक्तायली. कोंकणी भास गिरेस्त करपा खातीर धर्तरी आनी आकाश हीं दोनूय पुस्तकां वाचपाक जाय, अशें मावजो हांणी म्हणलें. शणै गोंयबाबाच्या जीविताचेर परिसंवाद आयोजित केल्ल्यान तांणी साहित्य अकादेमीक परबीं भेटयलीं.
शणै गोंयबाब हांचें द्रश्टेपण समजून तांच्या साहित्य आनी वावरा कडेन पळयल्यार तांची वळख घडप शक्य जातले, अशें अॅड. उदय भेंब्रे हांणी सांगले. शणै गोंयबाब हांणी गिरेस्त आनी समानतायेचो विचार मांडलो. गरीब आनी दुबळ्यांक जे पिडटात, तांका बुद्द शिकोपाची भास शणै गोंयबाब उलयताले, अशें तांणी सांगलें.
साहित्य अकादेमीचे गोंयचे प्रतिनिधी डॉ. पूर्णानंद च्यारी हांणी प्रास्ताविक केले. शशिकांत पुनाजी हांणी सुत्रनिवेदन केलें.