भांगरभूंय | प्रतिनिधी
राजू नायक: मल्लिकार्जुन महाविद्यालयांत शिवजयंती निमतान विवीध मानेस्तांचो भोवमान
काणकोण: म्हादयचें अपहरण, कॅसिनो संस्कृतीचो वेढो, घुस्मटमार जाल्ली राजधानी पळयल्यार हुस्को जाता. ताका लागून नागरी सुराज्या खातीर फुडल्या धा वर्सांनी दरेका तरणाट्यान सभावान ‘शिवाजी’ जावप गरजेचें, असो उलो पत्रकार राजू नायक हांणी दिलो.
श्री मल्लिकार्जून आनी चेतन मंजू देसाय महाविद्यालयांत शिवजयंती निमतान विशेश कार्यावळीचें आयोजन केल्लें. ह्या वेळार मुखेल सोयरे म्हणून राजू नायक उलयताले. माचयेर मुखेल वक्ते म्हणून प्रा. श्रीकृष्ण अड़सूळ, ज्ञान प्रबोधीनी मंडळाचे अध्यक्ष चेतन मंजू देसाय, उपाध्यक्ष के. बी. गांवकार, सचीव मंजुनाथ देसाय, राजेंद्र देसाय, ज्ञान प्रबोधिनीचे हेर वांगडी, प्रा. डॉ. मनोज कामत हाजीर आशिल्ले.
गोंयांत राजकी आनी समाजीक बदलाची गरज आसा. ताका लागून तरणाट्यांक ‘आत्ममग्न’ अवस्थेंतूच भायर काडप गरजेचें. येवपी संकश्टांक तोंड दिवपाची आनी दुश्टपणांचेर आळ घालपाची तांक फकत तरणाट्यां कडेन आसा, अशें राजू नायक हांणी सांगलें.
प्रा. श्रीकृष्ण अड़सुळ हांणी समकालीन युगांतले छत्रपती शिवाजी महाराज ह्या विशयाचेर म्हायती दिली. तांणी, छत्रपती शिवाजी महाराज युगपुरूश आशिल्ले. हें पुराय संवसारान मान्य केलां. ताका लागून रशिया, अमेरिका आनी हेर देशांच्या विद्यापीठांतल्यान छत्रपती शिवाजी महाराजांचेर अभ्यास करपा खातीर स्वतंत्र अश्या पिठासनाची निर्मिती केल्या अशें तांणी सांगलें.
ह्या वेळार महाविद्यालयाचे संस्थापक वांगडी स. डॉ. जिबलो नायक गांवकार हांच्या उगडासान रोहिदास देसाय हांकां पुरस्कार, तशेंच सहकार महर्शी स. जयसिंगराव राणे हांचे यादीन गुरु कोमरपंत हांकां, स. डॉ. पुंडलीक गायतोंडे हांच्या उगडासान ज्योती कुंकळकार, तेरेखोल वीर क्री. आल्फ्रेड आल्फान्सो हांचे यादीन पुरस्कार जे. पी. मार्टिन्स हांकां, तशेंच स. आशालता वाबगांवकर हांच्या उगडासान पुरस्कार इंदुमती म्हाळशी हांकां, जाल्यार स. सिताराम टैंगसे हांच्या उगडासान पांडुरंग फुग्रो हांकां पुरस्कार भेटयले. शाल, श्रीफळ, मानपत्र अशें पुरस्कराचें स्वरूप आशिल्लें. ह्या वेळार राजू नायक आनी प्रा. अडसूळ हांचोय भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
