भांगरभूंय | प्रतिनिधी
सुलक्षणा सावंत: झुआरीनगरच्या एमईएस म्हाविद्यालयाचो इनामां भेटवण सुवाळो उमेदीन
वास्को: भोंवतणचे दरेके गजालींतल्यान शिकपा खातीर, स्वताचें गिन्यान वाडोवपा खातीर, सर्तीच्या काळांत जियेवपा खातीर तरणाट्यांनी सतत लक्ष केंद्रीत करचें आनी सतर्क रावचें अशें भाजपा महिला मोर्चा राज्य अध्यक्ष सुलक्षणा सावंत हांणी हांगा एका कार्यावळी वेळार म्हणलें.
झुआरीनगराच्या एमईएस वसंत जोशी कला आनी वाणिज्य महाविद्यालयाच्या वर्सुकी इनामां भेटवण सुवाळ्याक मुखेल सोयरी ह्या नात्या सुलक्षणा सावंत उलयताली. ह्या वेळार माचयेर मुरगांव एज्युकेशन सोसायटीची भांडारी ललिता जोशी, प्राचार्य डॉ. मनस्वी कामत, विद्यार्थी मंडळाचे अध्यक्ष प्रा. सत्यवान नायक, सरचिटणीस अंकीत यादव हाजीर आशिल्ले.
सुलक्षणा सावंत हांणी जिणेंतल्यान अणभवांचेर भर दिली. तांणी ‘मेक इन इंडिया’ची तोखणाय केली. विवीध समकालीन घडणुकांची आनी लोकांचीं उदाहरणां दितना देशाक संवसारांत मुखार व्हरपा खातीर देशांतल्या मनीस संसाधनांचो योग्य वापर करपाची गरज तिणें उक्तायली.
ललिता जोशी हांणी समाजा कडल्यान जें कितें घेतलां तें समाजाक परत दिवपाची आनी आपल्या बर्या कतृपांनी खो मेळोवपाची गरज आशिल्ल्याचें तिणें ह्या वेळार उलयतना सांगलें.
प्राचार्य डॉ. मनस्वी कामत हांणी हे कार्यावळीक हाजीर आशिल्ल्या सगळ्यांक येवकार दिलो. तशेंच तिणें 2022-23 ह्या वसउरकी वर्साचो अहवाल सादर केलो. महाविद्यालयाच्या भांगराळ्या महोत्सवी वर्सा निमतान महाविद्यालयान आयोजीत केल्ल्या विवीध उपक्रमांची म्हायती तिणें दिली. तशेंच संस्थेच्या, विद्यार्थ्यांच्या कामगिरी विशीं अभिमान उक्तायलो.
प्रा. सत्यवान नायक हांणी माचयेर हाजीर आशिल्ल्या मुखेल सोयर्यांची वळख करून दिली. एमईएस महाविद्यालयाचे संस्थापक प्राचार्य माधव कामत हांणी बरयल्लें ‘द टेल ऑफ अ सक्सेसफूल जर्नी’ पुस्तक आनी स्मृतीचिन्ह भेटोवन सुलक्षणा सावंत हांचो ह्या वेळार भोवमान केलो. इंग्लीश विभागाची मुखेली डॉ. ए. एस. एस. सुसान डेबोरा, प्रा. स्निग्धा नायक, प्रा. वसंत पेडणेंकार हांणी सुत्रसंचालन केलें. सुलक्षणा सावंत हांचे हस्तुकीं महाविद्यालयाच्या वृत्तपत्राचो चोवथो खंड, ’द व्हॉईस ऑफ एमईएस’चें प्रकाशनूय ह्या वेळार केलें. अंकीत यादव हांणी उपकार मानले. ह्या वेळार व्हडा संख्येन विद्यार्थी, पालक आनी शिक्षक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
