भांगरभूंय | प्रतिनिधी
भांगरभूंय । प्रतिनिधी
वाळपयः गोंयच्या गांवगिऱ्या वाठाराचें शारीकरण जायत आसा. बदलत वचपी जिणेशैली आनी पाश्चात्य संस्कृतीचें लोकांचेर जावपी परिणाम हाका लागून आमची मूळ संस्कृती खंय तरी शेणत चल्ल्या. अश्या वेळार संस्कृती संवर्धनाचो वावर तरणाट्यांनी आपल्या भुजार घेवन वावराक लागपाक जाय, अशें शिक्षण तज्ज्ञ डॉ नारायण देसाय हाणे सांगलें. ग्रामीण शिक्षण आनी कला संस्थे वतीन दर वर्सा दितात तो सर्गेस्त विष्णू गाडगीळ सत्तरी अस्तिताय पुरस्कार अंदू झिलू गांवकार हाका भेटोवपाचे कार्यावळीत ते उलयताले.
ह्या वेळार माचयेर कार्यावळीचो अध्यक्ष विठ्ठल सुखटणकार, मुखेल सोयरे डॉ प्रकाश वझरीकार, प्रकाश गाडगीळ, ग्रामीण शिक्षण आनी कला संस्थेचो अध्यक्ष अंकुश धुरी, सचीव प्रकाश गावंकार आशिल्लो. डॉ देसाय हाणे गांवगिऱ्या आनी शार वाठारांतल्या संस्कृती संवर्धना विशींचे सद्याचे परिस्थिती विशी तपशीलवार विवेचन केलें. वाडत चलिल्ल्या मोबायल फॅडाक लागून आमचे संस्कृतीक धपके बसपाक लागल्यात. एकवटीत सोडून विभक्त कुटूंब पद्दती येवपाक लागल्या. ताका लागून आमच्या निजाच्या संस्कृतीचें बाळकडू भुरग्यांव मेळप कुस्तार जालां. हाचे परिणाम फुडराक आमका दिसतले. अशी परिस्थिती येवची न्हय हे खातीर दरेकल्यान सादूर रावपाक जाय. फुडले पिळगेक आमचे संस्कृतीचे गिन्यान मेळपाक जाय जाल्यार दरेका सक्रिय जावपाक जाय. समाजांतल्या जायत्या घटकां कडल्यान संस्कृती राखून दवोरपाचें काम चल्लां तरी ताचो विस्तार जावपाक जाय. झिलू गांवकार सामाजीक आनी संस्कृती संवर्धनाचो म्हत्वाचो वावुरपी आसा. सत्तरी अस्मिताय पुरस्कारा खातीत ताची केल्ली निवड फावो अशी आसा अशें डॉ देसाय हाणे सांगलें.
सुरवेक प्रास्तावीक करतना अंकुश धुरी हाणे सांगलें की गांवगिऱ्या वाठारांत कला आनी सामाजीक उदरगते खातीर ग्रामीण शिक्षण आनी कला संस्थेची स्थापणूक केल्ली. सत्तरी अस्मिताय पुरस्कार कला आनी सामाजीक मळार वावुरता तांकां दितात. सत्तरी तालुक्याच्या वेगवेगळ्या मळार उल्लेखनीय काम करपी व्यक्तींक फुडाराक तो दितले अशें ताणे सांगलें. झिलू गांवकाराक मानेस्तांचे हस्तुकीं शाल, श्रीफल आनी भेटवस्तूच्या रुपांत सत्तरी अस्मिताय पुरस्कार भेटयलो. डॉ प्रकाश वझरीकार हाणे झिलू गांवकाराची प्रकट मुलाखत घेतली. प्रशांत नायकान मानेस्तांची वळख करून दिली. रघुनाथ धुरीन झिलू गांवकाराची वळख करून मानपत्राचें वाचन केलें. सूत्रसंचालन सुश्मिता गांवसान केले आनी प्रकाश गांवकारान उपकार मानले. सुरवेक उदय माजीक आनी लता गांवसस हांच्या गायनाची कार्यावळ जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
