भांगरभूंय | प्रतिनिधी
रामा काणकोणकार हल्लो प्रकरणांत 14 जाणांक धरल्यात. काल सांजवेळा जेनिटो कार्दोजाक अटक जाली. ‘‘तो ह्या हल्ल्याचो सुत्रधार, मात तो निमणो ‘मास्टर मायंड’ काय आनीक कोण, तें कळना. चवकशी, मोबायल फोना वयली म्हायती तपासतकच ह्या प्रकरणाचेर आनीक उजवाड पडटलो’’, अशें पुलिसांनी सांगलां. जेनितोचेर हाचे पयलीं आरोप जाल्यात. तातूंत खुनाचो यत्न, खंडणी अशीं कितलींशींच प्रकरणां आसात. अटकूय जाल्या. 2009 त शिरदोन केस्तांवां प्रकरणांत, 2013 त राष्ट्रीय सुरक्षा कायद्या खाला, 20 जून 2020 दिसा इम्रान बेपारीच्या घराचेर हल्लो केल्लो तेन्ना. ह्या वाठारांत पयलीं सावन गुन्यांवकारी टोळयो आसात, हें साबार घडणुकां वेळार सिद्ध जालां. मात ताचेर नियंत्रण दवरपांत पुलीस येसस्वी जावंक नात.
जेनिटोक अटक जाली ताचे कांय वरां पयलीं वास्को एके जाण्टेलेक घरांत घुसून जिवेशी मारपाची घडणूक घडली. उपरांत तो थंयच बसून रावलो. वेर्णें एका आस्थापनांत मारपेट जालो. पुलिसांनी आतां कागाळ नोंद करून घेतल्या. हालींच सुरे बी घेवन कांय जाणांनी दक्षीण गोंयांत हल्लो केल्लो. हातूंत एक साम्य आसा, तें म्हणल्यार हल्ले करपी चडशे 20 ते 26 वर्सां पिरायेचे तरणाटे. जेनिटोची पिराय 36 वर्सां. ताणेंच रामा वयल्या हल्ल्याचें नियोजन केल्लें काय ताका तें कोणे करपाक लायिल्लें? हय, जाल्यार ताका धरपाचो यत्न जातलो? हो हल्लो वैयक्तीक दुस्मानकायेंतल्यान जाला काय आनीक कितें कारण आसा? नेमको हेतू कितें? हाचेरुय बेगीन उजवाड पडटलो, अशी आशा बाळगुया!! आयचे तरणाटे ह्या मार्गाचेर कित्याक चलतात, तांकां ताचे पसून परावृत्त करपाक कितें करचें पडटलें, ताचेर समाजान विचार करपाचो हो वेळ. सरकारी यंत्रणेनूय चड गंभीर, सादूर रावचें.
कामधंदो करीनासतना जोडपाची संकल्पना गोंयांत फाटल्या कांय वर्सां सावन लोकप्रीय जायत आसा. थोडे घरच्यांच्या म्हालवजाचेर जगतात. बेकायदेशीर कामां करतात. विशेश म्हणल्यार भोंवतेकांचे थळाव्या, राज्य पांवड्या वयल्या सगल्याच राजकारण्यां कडेन लागींचे संबंद आसतात. थोडे फुडाऱ्यांच्या, प्रतिश्ठीतांच्या वाडदिसांक बी हाजेरी लायतात. ताचे फोटे मागीर सोशल मिडियाचेर झळकतात. गोंयांतूच न्हय, तर पुराय देशांत हें चल्लां. ह्या फोटवांच्या भांडवलाचेर ते मागीर भौसाक ब्लॅकमेल करतात. आयकनात, तांचेर हल्लो करतात. थोड्यांक तर राजकी फुडारीच पोसतात. महाराष्ट्रांत सरपंचाक मारलो तो गुंड आनी ताचे वांगडी बंदखणींत आसात. तो गुंड जाचो उजवो हात आशिल्लो त्या मंत्र्याक फक्त पद सोडचें पडलें. मुखार कांयच जालें ना. घडये पुरावे नासतले. विशेश म्हणल्यार मतदारांनी ताची साथ सोडूंक ना. तरणाटे इबाडल्यात, तशे मतदारुय सुवार्थी जाल्यात, अशें म्हणचें पडलें ना. सायब कितें करता तें म्हाका लागना, म्हजें वैयक्तीक काम केलें काय जालें. म्हाका नोकरी, क्लब, धर्मीक थळ, मंडळाक देणगी, सणा- परबांक पोती, अडचणी वेळार अर्थीक मजत, काॅण्ट्रेक्ट दिलो, पुलिसांनी धरल्यार सोडयलो, बेकायदो काम कायदेशीर केलें जाल्यार खूब जालें…. ही आयज बऱ्याच लोकांची वृत्ती जाल्या. उरिल्ले फक्त उलयतात, सुवार्थ, भंय आड आयिल्ल्यान ठोस कृती करीनात. देखून कांय लोकप्रतिनिधी आनी तांच्या गुंडांचें फावलां. राजकारण गुन्यांवांनी, गैरप्रकारांनी, भ्रश्टाचारान खतावलां, बरबटलां ताका फुडारी, सरकारी यंत्रणा जापसालदार आसातूच, पूण ताचे परस चड सामान्य लोक जबाबदार आसात. ‘तुका म्हणे उगी राहावे, जे जे होईल ते पहावे’ इतलेंच आमका खबर. फुडलें ‘चित्ती असू द्यावे समाधान’ हें आमी विसरतात. समाधान मेळटलें तेन्नाच, जेन्ना आमचें राज्य सगल्या अर्थान आदर्श, शांत, गुन्यांवमुक्त आसतलें!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
