भांगरभूंय | प्रतिनिधी
श्रीपाद नायक: मांगोरहील हांगा जाल्ल्या हिन्दी कवी संमेलनाक बरो प्रतिसाद
वास्को: सात्वीक जीण, धिटाय, जिणेचे आदर्श गूण आमकां रामायणांत पळोवंक मेळटात. हे गूण आमी आपणायल्यार आमची जीण सुखावतली. आयचे तरणाटे पिळगेन भगवान श्री राम हांचो आदर्श आपणावपाचो असो उलो केंद्रीय राज्यमंत्री श्रीपाद नायक हांणी मारलो.
हेल्पफूल ऑर्गनायझेशन फॉर लाईकमायंडेड इंडियन्स म्हळ्यार होली संस्थेन मांगोरहील हांगच्या श्रीराम मंदिराच्या आंगणांत ‘एक भारत श्रेश्ठ भारत’ हे संकल्पनेचेर हिन्दी कवी संमेलनाचें आयोजन केल्लें. ह्या वेळार मुखेल सोयरे म्हणून श्रीपाद नायक उलयताले. ह्या वेळार माचयेर गोंयचे निवृत्त पुलीस महासंचालक डॉ. इंद्रदेव शुक्ल, जय भारत मंचाचे गिरीष जुयल, होलिचे अध्यक्ष के. के. चतुर्वेदी, सरचिटणीस सुरज नायक, गोवा शिपयार्डचे अध्यक्ष आनी वेवस्थापकीय संचालक ब्रजेश कुमार उपध्याय, पुलीस महानिरीक्षक ओमवीर बिश्र्नोई, केंद्रीय विद्यालयाचे प्राचार्य आर. ए. पाटील, प्रायार्य सी. बी. तिवारी, संस्थेचे उपाध्यक्ष जे. के. सिंग, सचीव बी. एम. यादव, सचीव सरोज राय, वांगडी आनी सल्लागार अॅड. बीरेंद्र सिंह, राम मंदीर सेवा समितीचे अध्यक्ष शैलेंद्र तिवारी, सरचिटणीस अभिषेक राय हाजीर आशिल्ले.
ह्या कवीसंमेलनाक बरो प्रतिसाद मेळ्ळो. हे संस्थे वतीन दर वर्सा गोंयच्या विवीध म्हालांनी कवी संमेलन आयोजीत करता. ह्या कवीसंमेलनांत संजीव दुबे (झांसी), अभिराम पाठक (चत्तरपूर), रवी शंकर (सातना), विकास भौकाल (बाराबंकी), डॉ. अनू सपान (भोपाळ) हांणी देशभक्ती तशेंच हास्यकविता सादर केल्यो.
ह्या वेळार मंत्री नायक हांचो संस्थे वतीन भोवमान जालो. तशेंच कवी कवयित्री तशेंच विवीध मळांचेर योगदान दिल्ल्या मानेस्तांचो भोवमान केलो. के. के चुतर्वेदी हांणी येवकार दिलो. सुरज नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
