भांगरभूंय | प्रतिनिधी
मुख्यमंत्री: पाळींतल्या शेतकारांक फळ झाडां आनी कलमां वाटलीं
दिवचल: राज्यांतल्या तरणाट्यांनी आधुनीक तंत्राचो वापर करून पडींग तशेंच हेर शेतांची लागवड करून पांचवी क्रांती चालीक लावची. हातूंत खुबश्यो संदी आनी सुविधायो उपलब्ध आशिल्ल्यान पांचवे क्रांती वरवीं जिणेंत येसाचें व्हड पावल मारप शक्य आशिल्ल्याचें मुख्यमंत्री डॉ. प्रमोद सावंत हांणी सांगलें.
पाळी पंचायत वाठारांतल्या शेतकारांक फळ झाडां आनी कलमां वाटलीं. दिवचल विभागीय कृशी खात्या वतीन शेतकरी मेळावो आनी कलमां वाटपाचे कार्यावळीक सरपंच शिवदास मुळगांवकार, कृशी अधिकारी निलिमा गांवस, पंकज पोकळे, पुनम महाले, गौरांगी परब, संतोष नायक, प्रसाद सावंत, प्रशिला गावडे, गणेश पाटवळकार, दिपक नायक, आशा गवळी, महादेव नायक आनी हेर हाजीर आशिल्ले.
सरकारी नोकरेचो आग्रो धरचे परस उपलब्ध साधनांचो वापर, कुशळटायेचो वापर, आधुनीक साधनांची उर्बा आनी सरकारी येवजण्यांचो फायदो घेवन पुर्वजांचे जमनीचेर तशेंच गट पांवड्यार शेती चालीक लावपाक फुडाकार घेवचो. दरेक शेतकार आपली कुशळटाय वापरून काम करता जाल्यार तो सहज लक्ष्मीपुत्र जातलो. परदेसांत आयज खुबश्या गजालींक बरीच मागणी आसा. आपली कुशळटाय वापरून काम केल्यार दरेक शेतकार सहजतायेन लाखांनी जोडपाक शकता अशेंय मुख्यमंत्र्यान फुडें म्हणलें.
निलिमा गांवस, पंकज पोकळे, पुनम महाले हांणी कृशी येवजण्यांची ह्या वेळार म्हायती दिली. सरपंच शिवदास मुळगांवकार हांणी आपले विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
