भांगरभूंय | प्रतिनिधी
‘हिस्ट्री दॅट इंडिया इन्गोर्ड’ पुस्तकाचें लोकार्पण
भांगरभूंय । प्रतिनिधी
पणजी : गोंयांतले युवा पिळगेन देश्च्या स्वातंत्र्य संग्रानाचो, गोंय मुक्तीचो लडो खोलायेन वाचून तो देशा मुखार, संवसारा मुखार दवरप गरजेचें आसा. चित्रपट निर्माते, डिजिटल क्रिएटर तज्ञांनी हे विशीं थळावे भाशेंत लघुपट, पॉडकास्ट करचें, असो उलो मुख्यमंत्री डॉ. प्रमोद सावंत हांणी मारलो. सोमारा ‘हिस्ट्री दॅट इंडिया इन्गोर्ड’ पुस्तकाचें लोकार्पण सुवाळ्यांत ते उलयताले. ह्या वेळार लेखक प्रेम प्रकाश, वैशाली जोशी हाजीर आशिल्ली.
मुख्यमंत्र्यान सांगलें, आतांचे पिळगेक कळटलो अशे पद्दतीन इतिहास सांगपाक जाय. तातूंत आमच्यो गजाली सांगल्यो मात जाल्यार हेर कोणूय इतिहासाचो चुकीचे पद्दतीन अर्थ काडून ते संवसारा मुखार मांडटले. प्रेम प्रकाश हांच्या पुस्तकाक लागून आमच्या इतिहासांतल्यो मुद्दाम आडनदर केल्ल्यो वा कुशीक दवरिल्ल्यो गजाली स्पश्टपणान मांडल्यात. हाका लागून स्वातंत्र्य लढ्यांतली विसरायेर गेल्ली शूरवीरांची म्हायती संवसारा मुखार आयल्या.
पुस्तकांत विनायक दामोदर सावरकर, नेताजी सुभाषचंद्र बोस हांचे विशीं म्हायती दिल्या. लेखकान दोनूय स्वातंत्र्य सैनिकांची बाजू योग्य पद्दतीन मांडल्या. गोंयच्या मुक्ती संग्रामा विशीं भारतीय इतिहासांत चडशी म्हायती नासता. मात ह्या पुस्तकांत गोंयच्या मुक्ती संग्रामा विशीं लेलगीत एक प्रकरण आसा. हजारांनी गोंयकारांनी पुर्तुगेज शासकांचो केल्लो विरोध, तांणी सोंशिल्ले अत्याचार हांची म्हायती पुस्तकांत दिल्या, अशें मुख्यमंत्री डॉ. सावंत हांणी सांगलें.
गोंय दुसरें हाँगकाँग जावपाचें : प्रेम प्रकाश
दुसऱ्या म्हाझुजा उपरांत अमेरिकन सैन्या खातीर हाँगकाँग हें रेस्ट आनी रिक्रिएशन केंद्र जाल्लें. गोंय पुर्तुगेजांच्या ताब्यांत आशिल्लें तरी लेगीत अमेरिका गोंयाक दुसरें अशें केंद्र करपाक शकताली. मात सुदैवान अशें जावंक ना, अशें प्रेम प्रकाश हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
