भांगरभूंय | प्रतिनिधी
अरुण म्हात्रे : खांडोळें म्हाविद्यालयांत रंगलें कवितांचें सादरीकरण
भांगरभूंय । प्रतिनिधी
माशेलः कविता ही खंयचेय पिरायेंतल्या मनशाक भुरळ घालता. आयचे तरणे पिळगेन एक तरी कविता बरोवचीच, अशें नामनेचे कवी अरूण मात्रे हांणी सांगलें.
खांडोळेंच्या सरकारी म्हाविद्यालयाच्या मराटी विभागान आयोजीत केल्ले ‘कवितेच्या काठावरची सफर’ हे कार्यावळींत ते उलयताले. हे कार्यावळींत तांणी बहिणाबाई चौधरी, कुसुमाग्रज, बा. भ. बोरकार, विंदा करंदीकर, मंगेश पाडगांवकर, नारायण सूर्वे, सुरेश भट ह्या नामनेच्या कवींच्यो कविता त्या त्या कवींचे शैलींत सादर केल्यो. तशेंच आपल्याय कवितांचें सादरीकरण करून सेगीत वर कविता रसिकांक रिझयले. ‘विसरता येत नाही’, ‘उंच माझा झोका’ सारकिल्ल्यो तांच्यो फामाद कविताय तांणी सादर केल्यो.
कितल्याश्याच कवींक ते जिवीत आसतना तांकां आपूण मेळपाक शकलों, तांच्या सांगातान रावून तांणी रचिल्ल्या कवितांचो अणभव घेवपाक शकलों, ही आपले खातीर भाग्याची गजाल, अशें आपूण मानतां, अशें म्हात्रे हांणी सांगलें.
ह्या वेळार म्हाविद्यालयाची प्राचार्य प्रा. डॉ. पुर्णकला सामंत, आय.क्यू.ए.सी. समन्वयक आनी उपप्राचार्य (प्रशासन) डॉ. डिलेक्टा डिकॉस्टा, उपप्राचार्य डॉ. आशा गेहलोत, मराठी विभाग मुखेली डॉ. सुनेत्रा कळंगूटकार माचयेर हाजीर आशिल्ले. कार्यावळीचे सुरवेक संपुर्णा भगत हे विद्यार्थिनीन ईशस्तवन सादर केलें. ते उपरांत मानेस्तांनी दिवली पेटोवन कार्यावळीचें उक्तावण केलें. प्राचार्य प्रा. पुर्णकला सामंत हांणी येवकार दिलो. डॉ. सुनेत्रा कळंगूटकार हांणी प्रास्तावीक केलें. सहाय्यक प्रा. सोनल हळर्णकार हांणी सोयऱ्यांची वळख करून दिली, सहाय्यक प्रा. दुमती कुंभार हांणी सुत्रसंचालन केलें जाल्यार सहाय्यक प्रा. दुर्गा जांभळे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
