भांगरभूंय | प्रतिनिधी
पणजीः तरणाट्यांच्यो कुशळटाय उदरगत कार्यावळी घटमूट करपा खातीर, वेवसायीक शिक्षणाक चालना दिवपा खातीर तशेंच सरकारी खातें, शिक्षणीक संस्था आनी उद्देगीक भागीदार हांचे मदीं सहकार्य वाडोवपा खातीर राज्य सरकारान हालींच सात समजिकाय कबलाती केल्यात. मुख्यमंत्री डॉ. प्रमोद सावंत हांचे हाजिरेंत कुशळटाय विकास आनी उद्देजकता तशेंच हेर पांच खात्यां वरवीं ह्यो कबलाती केल्यात.
राज्यांतल्या 10 सरकारी आनी 3 खाजगी उद्देगीक प्रशिक्षण संस्थांनी (आयटीआय) “द बर्ड्स अँड द बीज टॉक” जिवीत कुशळटाय कार्यावळ चालीक लावपा खातीर कुशळटाय उदरगत खाते, प्लॅन इंटरनॅशनल (इंडिया चॅप्टर) आनी वर्शिप डिझायन हांचे मदीं त्रिपक्षीय कबलात केल्या.
मुख्यमंत्री कुशळटाय पाठ येवजणे खाला मशरूम लागवडींत अल्प-मुजतीचे प्रशिक्षण कार्यावळी घडोवन हाडपा खातीर खात्यान वाना श्रब्स प्रा. लि. वांगडा कबलात केल्या.
ह्या उपक्रमांतल्यान ऑयस्टर मशरूम लागवडीचें वैज्ञानिक आनी प्रात्यक्षिक प्रशिक्षण दितले. हाका लागून सहभागी लोकांक स्वताची रोजगाराची संद मेळटली. तशेंच टिकावू आनी पर्यावरणाक अनुकूल शेतकी पद्दतींक चालना मेळटली. शिक्षण खात्या कडेन केल्ल्या कबलातीक लागून यत्ता णवी ते बारावेच्या विद्यार्थ्यांक आयटीआयक ‘ओपन डे’ भेट दिवपाक सुविधा मेळटली. हाका लागून विद्यार्थ्यां मदीं वेवसायीक शिक्षण आनी कुशळटाय कार्यावळी विशीं जागृताय निर्माण जातली.
ड्युअल प्रमाणपत्र
उच्च शिक्षण संचालनालया कडेन समजिकाय कबलातीक लागून मुख्यमंत्री कुशळटाय पाठ येवजणे खाला ड्युअल प्रमाणपत्र कार्यावळ शक्य जातली. हाका लागून विद्यार्थ्यांक शिक्षणा वांगडाच कुशळटायेचेर आदारिल्लें प्रशिक्षण घेवंक मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
