भांगरभूंय | प्रतिनिधी
मुख्यमंत्र्यांनी घेतली खात्यांच्या मुखेल्यांची बसका
भांगरभूंय । प्रतिनिधी
पणजी : केंद्रीय अर्थसंकल्पाचो नियाळ घेवपा सयत राज्याच्या अर्थसंकल्पाचे तयारे खातीर मुख्यमंत्री डॉ. प्रमोद सावंत हांणी शुक्रारा खात्यांच्या मुखेल्यांची बसका घेतली. विवीध खात्यां मदीं समन्वय सादपा खातीर सचिवांची नेमणूक केल्ल्याची म्हायती मुख्यमंत्री डॉ. प्रमोद सावंत हांणी दिली.
गोंयचें अर्थसंकल्पी अधिवेशन 6 ते 27 मार्च मेरेन जातलें. मुख्यमंत्री डॉ. प्रमोद सावंत हे पयल्याच दिसा म्हळ्यार 6 मार्चाक अर्थसंकल्प सादर करपाची शक्यताय आसा. मात अधिवेशनाची कार्यावळ थारोवपा खातीर कामकाज सल्लागार समितीची बसका अजून जावपाची आसा. अर्थसंकल्पाची तयारी मात नेटान चालू आसा. केंद्रीय अर्थसंकल्पाचे धरतेर गोंयचो अर्थसंकल्प आसतलो. केंद्रा कडल्यान राज्याक कितलो निधी मेळटलो ते प्रमाण तरेकवार खात्यां खातीर निधीची तजवीज जातली. हाचे खातीर केंद्रीय अर्थसंकल्पांतल्यो येवजण्यो तशेंच निधीचो नियाळ जालो. भौशीक बांदकाम खातें, वीज खातें, पेयजल खातें अशा विवीध खात्यांचो एकमेका कडेन संबंद येता. येवजण्यो वा निधीची तजवीज करतना हाचो विचार करचो पडटा. हाका लागून अर्थसंकल्पा खातीर विवीध खात्यां मदीं समन्वय सादपाचेर विचार विनिमय जालो. समन्वय सादपा खातीर सचिवांच्यो नेमणुको जाल्यात. अर्थसंकल्पी अधिवेशन 14 दिसांचें आसतलें. अधिवेशनाचो कालावधी उणो आशिल्ल्यान चर्चेक फावो त्या प्रमाणांत वेळ मेळचो ना, अशी टिका विरोधी पक्षांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
