भांगरभूंय | प्रतिनिधी
भांगरभूंय । प्रतिनिधी
पणजीः हिंदूच्यो धर्मीक भावना दुखयल्ले खातीर तमिळनाडूचो मंत्री उदयनिधी स्टॅलीन, कर्नाटकाची ग्रााम उदरगत मंत्री प्रियांका खर्ग आनी तमिळनाडूचो खासदार ए राजा हाचे आड हिंदुत्वनीश्ट संघटनांनी पणजी पुलीस स्टेशनांत कागाळ केल्या. सर्वोच्च न्यायालयान केल्ले सूचोवणे प्रमाण ‘हेट स्पीच’ संबंदी त्यांचेर फावो ती कारवाय करपाची मागणी तांणी पुलीस निरीक्षक निखील पालेकार हाचे कडेन केल्या.
संवसारीक भावचाराची शिकवण दिवंन सगल्यांक आसपावन घेवपी सनातन धर्माची डेंग्यू, मलेरिया, कोरोना, एड्स आनी कुश्ठ रोगा कडेन तुळा करून सनातन धर्म ना नपयत करपाची भास करपी उदयनिधी, खर्गे आनी ए राजा हांच्या वांगडा पत्रकार निखील वागळे आनी जितेंद्र आव्हाड हाचेर लेगीत हेट स्पीच केल्ले खातीर बेगोबेग गुन्यांव नोंद करून तांकां अटक करची. व्हो फकत हिंदू धर्मा वयलो हल्लो न्हय जाल्यार हिंदू ,संस्कृती, संस्कार आनी परंपरा हाचो अवमान आसा. तांचेर फावो ती कारवाय केली ना जाल्यार सर्वोच्च न्यायालयांत याचिका सादर करतले अशें कागाळेंत नमूद केलां.
कागाळ पत्राचेर गोमंतक मंदिर महासंघाचो सचीव शजयेश थळी, ‘भारत माता की जय’ संघटनेचो रामदास सावयवेरेंकार, पर्वरी हांगच्या श्री रामवडेश्वर देवस्थानचो आनंद मांद्रेकार, हिंदु जनजागृती समितीचो उत्तर गोंय समन्वयक गोविंद चोडणकार आनी सुशांत दळवी हांच्यो सयो आसात.
आयज पणजे जाग्रुती आंदोलन
मजगतीं. तमिळनाडूचो मंत्री उदयनिधी स्टॅलीन हांणी डेंग्यू, मलेरिया प्रमाण सनातन धर्माक सोपोवपाक जाय अशें विधान केल्ल्यान तशेंच सनातन धर्माचो अवमान केल्ले खातीर प्रियांक खर्गे आनी ए राजा हांचेर कारवाय करपाच्या मागणे खातीर हिदुत्वनिश्ठ संघटना आयज (शेनवार) पणजे आझाद मैदानार सांजे 5 वरांचेर हिंदू राष्ट्र जाग्रुती आंदोलन करतले. हिंदूनी तांतूंत वांटेकार जावंन धर्म कर्तव्य करचें अशें आयोजकांनी मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
