भांगरभूंय | प्रतिनिधी
स्पिनर मोहीत रेडकार (5-70) आनी मुखेली दर्शन मिशाळ (4-77) हांचे बॉलिंगे नेटार गोंय पंगडान तमिळनाडूचो डाव 273 धांवड्यांचेर सोंपयलो. तमिळनाडू पंगड एका वेळार गोंया आड व्हड आघाडी घेवपाचे दिकेन वतालो. पूण, रेडकार आनी मिशाळ ह्या स्पिनरांनी जबरदस्त प्रदर्शन करून तमिळनाडूक आडायलो आनी ताची पयल्या डावांतली आघाडी 32 धांवड्यां मेरेन मर्यादीत दवरली.
पर्वरी क्रिकेट अकादमीचेर चालू आशिल्ले लडतीच्या दुसऱ्या दिसाचे अखेर मेरेन गोंयान आपल्या दुसऱ्या डावांत बिनबाद 10 धांवड्यो केल्ल्यो. गोंय फकत 22 धांवड्यांनी फाटीं आसा. गोंयच्या पयल्या डावा प्रमाण तमिळनाडूची लेगीत तीच स्थिती जाली. 3 बाद 235 धांवसंख्येचेर दर्शन मिशाळान बाबा इंद्रजीताक एलबीडब्ल्यू बाद केल्या उपरांत मोहीत रेडकार आनी दर्शन मिशाळ हांणी तमिळनाडूचो डाव गडगडावन उडयलो.
फकत 38 धांवड्यांची भर घालून तमिळनाडूचे 7 बॅट्समन बाद जाले. विजयशंकरान कांय वगत गोंयच्या स्पिनरांचो प्रतिकार केलो. मोहीत रेडकाराचे बॉलिंगेचेर बाद जावचे पयलीं ताणें 98 बॉलांनी पांच चवके आनी एक सक्याचे मजतीन 54 धांवड्यो केल्यो. ते पयलीं ओपनर एस लोकेश्वर आनी एन जगदीशन हांणी 57 धांवड्यांची भागिदारी केली. मिशाळच्या बॉलाचेर लोकेश्वर बाद जाल्या उपरांत जगदीशन आनी प्रदोष रंजन पॉल हांणी दुसरे विकेटी खातीर 98 धांवड्यांची भागिदारी केली. जगदीशनाक मिशाळान आनी प्रदोष रंजन पॉलाक मोहीत रेडकारान बाद केलो. जगदीशनान 153 बॉलांनी 75 धांवड्यो केल्यो. हातूंत तीन चवक्यांचो आस्पाव आशिल्लो. प्रदोषान 71 धांवड्यांचें योगदान दिलें. बाबा इंद्रजीताक मिशाळान बाद केल्या उपरांत तमिळनाडूचे बॅट्समन एका फाटल्यान एक तंबूंत पचपाक लागले.
भुपती विष्णू कुमार, एम मोहम्मद आनी अजिथ राम हे शुन्याचेर बाद जाले.
धांवतकटोः गोंय (पयलो डाव) 241, तमिळनाडू (पयलो डाव) बिनबाद 20 वयल्यान 09.2 ओव्हरींनी सगले बाद 273 धांवड्यो, एस लोकेश्वर कॅ. मंथन खुटकार बॉ. दर्शन मिशाळ 25, एन जगदीशन बो.बॉ. दर्शन मिशाळ 75, प्रदोष रंजन पॉल बो. बॉ. मोहीत रेडकार 71, बी इंद्रजीत एलबीडब्ल्यू बॉ. दर्शन मिशाळ 24, विजयशंकर कॅ. के व्ही सिद्धार्थ बॉ. मोहीत रेडकार 54, भुपती विष्णू कुमार कॅ. दर्शन मिशाळ बॉ. मोहीत रेडकार 0, आर साईकिशोर धांवबाद 1, एम मोहम्मद बो. बॉ. मोहीत रेडकार 0, अजिथ राम कॅ. दीपराज गांवकार बॉ. मोहीत रेडकार 0, संदीप वॉरियर कॅ. दीपराज गांवकार बॉ. दर्शन मिशाळ 5, कुलदीप सेन नाबाद 1, अतिरिक्त 17.
बॉलींगः अर्जुन तेंडुलकर 10-0-52-0, हेरंब परब 8-4-12-0, लक्ष्य गर्ग 8-1-30-0, दर्शन मिशाळ 31-5-77-4, दीपराज गांवकार 11-1-22-0, मोहीत रेडकार 22.2-3-70-5.
गोंय (दुसरो डाव) बिनबाद 10 धांवड्यो (सुयश प्रभुदेसाय खेळटा 3, इशान गडेकार खेळटा 7)
बॉलींगः आर साईकिशोर 2-0-9-0, संदीप वॉरियर 1-1-0-0, प्रदोष रंजन पॉल 1-0-1-0.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
