भांगरभूंय | प्रतिनिधी
प्रकल्पा आड दाखल केल्ली याचिका न्हयकारली
पणजी ः गोंय तमनार ट्रान्समिशन प्रोजेक्ट लिमिटेड कंपनी (जीटीटीपीएल) गोंयांत वीज कायद्या खाला प्रकल्प उबारता. गोंयांतलो तामनाराचो प्रकल्प लोकांच्या फायद्याचो अशें निरिक्षण नेंद करुन गोंयच्या मुंबय उच्च न्यायालयान तमनार प्रकल्पा आड आमोण्याच्या 30 थळाव्या लोकांनी दाखल केल्ली याचिका न्हयकारली. हे संबंदींचो आदेश न्यायाधीश मकरंद कर्णिक आनी न्यायाधीश वाल्मीकी मिनेझिस हांच्या द्विसदस्यीय न्यायपिठान दिला.
आमोणें दिवचलेचे यशवंत गांवस, सदानंद गांवस, मिलिंद गांवस, विजयकुमार परब, तुळशीदास गांवस आनी हेर 25 जाणांनी ह्या प्रकरणांत याचिका दाखल केल्या. तातूंत तांणी केंद्र सरकार, केंद्रीय वीज प्राधिकरण, राज्य सरकार, उत्तर गोंय जिल्होधिकारी, दिवचल उपजिल्होधिकारी, गोंय तमनार ट्रान्समिशन प्रोजेक्ट लिमिटेड कंपनी (जीटीटीपीएल), आमोणा पंचायत आनी दिवचल मामलेदार हांकां प्रतिवादी केलां. 7 एप्रिल 2022 दिसा सर्वोच्च न्यायालयान जीटीटीपीएलाक दिल्ल्या आदेशा प्रमाण, म्हापशें ते सांगोड आनी सांगोड ते कुडचड्यां वाठारांतल्या 220 केव्ही लायनींतल्यान 400 केव्ही लायन घालची अशीं मागणी केलां. ह्या प्रकल्पा खातीर वीज लायनी सोडून हेर सुवातींनी हस्तक्षेप करपाचेर बंदी घालची. तशेंच फुडाराक कसलोच बदल जावचो ना हाचीय हमी कंपनीन दिवची अशी मागणी याचिकेंत केल्या. ह्या प्रकरणांत न्यायालयान दोनूय वटेनची बाजू आयकून वयले निरिक्षण नोंद केलें आनी याचिका न्हयकारली.
सरकारान उच्च न्यायालयांत सांगलें…
० तमनार वीज प्रकल्प उबारपा खातीर आवश्यक झाडां कापपा खातीर झाडां प्राधिकरणा कडल्यान परवानगी घेतल्या.
० ज्या लोकांची जमीन प्रकल्पा खातीर वापरपाची आसा तांच्या लुकसाण भरपायेच्या दाव्याचेर बेगोबेग विचार करून कायद्या प्रमाण निवाडो दितले.
० प्रकल्पाची अंमलबजावणी करतना याचिकादारांच्या मालमत्तेचें उण्यांत उणें लुकसाण जातलें हाची जतनाय घेतले.
० कायद्या प्रमाण याचिकादारांक लुकसाण भरपायेचो मार्ग मेकळो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
