भांगरभूंय | प्रतिनिधी
31 मे 2025 ही प्रकल्प पुराय करपाची डेडलायन
पणजी : आतां मेरेन तमनार प्रकल्पाचें काम 50 टक्के पुराय जालां. हो प्रकल्प फुडें व्हरपा खातीर गोंय सरकारच्या रानां आनी वीज खात्यान फाटपुरवण करची, अशें निर्देश केंद्र सरकाराच्या सचिवांनी दिल्या. प्रकल्पाचो नियाळ घेवपा खातीर दिल्लींत अधिकारी गटाची बसका जाली. बसकेंत तांणी हे निर्देश दिले.
गोंय सरकाराच्या गोपां कडल्यान ही म्हायती मेळ्ळी. तमनार प्रकल्प पुराय करपा खातीर 31 मे 2025 ही नवी डेडलायन आसा. प्रकल्पाचें काम समाधानकारक पद्दतीन सुरू आसा. गोंय सरकारच्या रानां आनी वीज खात्यान सोपस्कार पुराय करून काम फुडें व्हरचें, अशी शिफारस बसकेंत केल्या.
तमनार, रेल्वे दोट्टीकरण तशेंच गोयांत सुरू आशिल्ल्या प्रकल्पांचो नियाळ घेवपा खातीर केंद्रीय अधिकारी गटाची दिल्लींत बसका जाली. गोंयचे मुखेल सचीव तशेंच हेर अधिकाऱ्यांनी व्हिडीयो कॉन्फरंसींग माध्यमांतल्यान बसकेंत वांटो घेतलो.
केंद्रीय उर्जा मंत्रालयाचो हो प्रकल्प गोंय, कर्नाटक आनी छत्तीसगड राज्यां कडेन संबंदींत आसा. 1,531 कोटींच्या ह्या प्रकल्पाचें काम 14 मार्च 2018 दिसा सुरू जाल्ले. हो प्रकल्प 30 नोव्हेंबर 2021 तारखे मेरेन पुराय जावपाचो आशिल्लो. तरेकवार कारणाक लागून प्रकल्पाक कळाव जालो. प्रकल्पाचें 50 टक्के काम पुराय जालां. प्रकल्प पुराय करपाची 31 मे 2025 ही नवी डेडलायन आसा.
प्रकल्पाक रानजीव मंडळाची मान्यताय
ह्या प्रकल्पाक हालीच गोंय राज्य रानजीव मंडळान मान्यताय दिल्या. सांगोड ते कर्नाटक शिमे मेरेन 400 केव्ही वीज वाहिनी उबारपाचें काम ह्या प्रकल्पा अंतर्गत जातले. गोंयची विजेची गरज पुराय करपा खातीर हो प्रकल्प गरजेचो आसा, अशें मुख्यमंत्री डॉ. प्रमोद सावंत हांणी म्हणलें. गोंय सरकारान प्रकल्पा खातीर परवाने जारी करून आडखळ पयस करची अशें पत्र गोवा चेंबरान गोंय सरकाराक बरयलां. जे जाग्यांचेर टाॅवर उबारतले, थंयचीच झाडां कापतले. हेर झाडां कापचें नात, अशें अधिकाऱ्यांनी स्पश्ट केलां. सध्या गोंयांक पश्चीम ग्रिडांतल्यान वीज पुरवण करपी 400 केव्हीची एकूच लायन आसा. तमनार प्रकल्प जाले उपरांत पश्चीम ग्रिडांतल्या लायनींत इबाड जाल्यार पर्यायी वेवस्था करप सोंपे जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
