भांगरभूंय | प्रतिनिधी
पणजी : तमनार पावर लायनीक रानां जीव मंडळान सशर्त मान्यताय दिल्ल्यान गोंय सरकाराक थाकाय मेळ्ळ्या. पावर लायनी खातीर भगवान महावीर अभयारण्यांतली 27 हेक्टर जमीन वापरपाक राष्ट्रीय रानां जीव मंडळान मान्यताय दिल्या. तशेंच कर्नाटकांतल्या 435 एकर जाग्यांतल्यान लायन व्हरपा खातीर सशर्त मान्यताय दिल्या. कर्नाटकांतल्या लायनी खातीर कर्नाटक रानां जीव मंडळाची मान्यताय घेवपाची अट आसा.
केंद्रीय रानां आनी पर्यावरण मंत्री भूपेंद्र यादव हांचे फुडारपणा खाला राष्ट्रीय रानां जीव मंडळाची बसका जाली. हे बसकेंत तमनार प्रकल्पाचेर चर्चा जाली. अभयारण्य वाठारांतल्यान लायनीचे (वीज वाहिनी) काम करपाक मान्यताय दिली.
तमनार प्रकल्प हो गोंय – कर्नाटक आनी छत्तीसगड राज्यां मदलो वीज प्रकल्प आसा. हो प्रकल्प जाले उपरांत गोंयाक हेर खंयच्याय राज्यांतल्यान वीज घेवप शक्य जातलें. दिसान दीस विजेची गरज वाडत आसा. फुडाराक विजेची गरज भागोवपा खातीर हो प्रकल्प गरजेचो आसा, अशी भुमिका मुख्यमंत्री डॉ. प्रमोद सावंत आनी वीज मंत्री सुदिन ढवळीकार हांणी घेतल्या. धारबांदोड्यां 400/220 केव्ही सबस्टेशनाची उबारणी ह्या प्रकल्पा खाला जातली. तशेंच म्हापश्यां – शेल्डें – नरेंद्र (कर्नाटक) मेरेन 400 केव्ही डीसी पावर लायन उबारपाचो प्रस्ताव आसा. धारबांदोड्यां सबस्टेशन तशेंच गोंयांत 400 केव्ही डीसी पावर लायन उबारपाचो वावर सुरू आसा.
धारबांदोडें ते नरेंद्र (कर्नाटक) मेरेनची लायन मोलें (भगवान महावीर अभयारण्य) तशेंच कर्नाटकांतल्या दांडेली रानां वाठारांतल्यान वता. मोलें अभयारण्यांतल्यान 27 हेक्टर वाठारांतल्यान लायन (वीज वाहिनी) व्हरपाक मान्यताय दिवची, असो प्रस्ताव गोंय सरकारान सादर केल्लो. हाका रानां जीव मंडळान मान्यताय दिल्या. हाका लागून मोलें अभयारण्यांत पावर लायनीचें काम करपाक सरकाराक मेकळीक मेळ्ळ्या. कर्नाटक वाठारांतले काम करपाक राष्ट्रीय रानां जीव मंडळान सशर्त मान्यताय दिल्या. कर्नाटक रानां जीव मंडळाची मान्यताय मेळ्ळे उपरांत हें काम सुरू करप शक्य जातलें. हाका लागून कर्नाकांतल्या कामां खातीर कर्नाटक रानां जीव मंडळाची मान्यताय घेवची पडटली.
ह्या प्रकल्पाक केंद्रान 2015 वर्सा मान्यताय दिल्ली. काम सुरू जाले उपरांत कांय एनजीओंनी सर्वोच्च न्यायालयांत प्रकल्पाक आव्हान दिलें. प्रकल्पाचो नियाळ घेवपा खातीर सर्वोच्च न्यायालयान उंचेल्या पांवड्यार (सीईसी) समिती स्थापन केली. ह्या समितीन पळोवणी करून सध्याची 220 केव्ही लायन वापरपाची सुचोवणी केली. तशेंच पर्यावरण वाटावपा खातीर उपाय सुचयले. हाचे उपरांत परतून नेटान काम सुरू जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
