भांगरभूंय | प्रतिनिधी
तबल्या बगर जिणेची कल्पना करप म्हजे खातीर अशक्य आसा. हीं उतरां आसात, उस्ताद झाकीर हुसेन हांचीं. सोमारा सकाळीं तांच्या मरणाची खबर आयली. तबल्याचेर थिरकपी बोटां सदां खातीर शांत जालीं. तालवाद्याच्या विश्वांतलें एक पर्व सोंपलें. आयज मनोरंजनाचीं साधनां वाडल्यांत देखून कलाकारां कडेन रसीक सोडल्यार हेरांचें लक्ष वचना. कोण कितलो म्हान ताचोय साक्षात्कार जायना. आदल्या तेंपार साहित्य संमेलनां, महोत्सव, जात्रां वेळार जावपी मैफलींक संगीतदर्दी घिट्टी घालताले. कलाकाराक आयकुपाची ओढ आसताली. कलाकारूय एका परस एक दर्जेदार. कांय कलाकार आनी वाद्यां हांचें तर समीकरणूच जाल्लें. देखीक शेनाय म्हणल्यार उस्ताद बिस्मिल्लाह खान, सतार- पं. रवीशंकर, बासरी- पं. हरिप्रसाद चौरसिया, सरोद- अमजद अली खान, संतूर – पं. शिवकुमार शर्मा…. आनी हेर थोडे. हातूंत आनीक एक नांव जोडपाक जाय, तें म्हणल्यार उस्ताद झाकीर हुसेन. पिरायेचीं पन्नाशी हुपिल्ल्यांक थारावीक वाद्यां पळयलीं काय मेजकेच कलाकार दोळ्यां मुखार येतात. वाद्य हें त्या कलाकारांचे जिणेचें एक आंगूच जाल्लें.
उस्ताद अल्लारखाँ कुरेशी हे देशांतले एक आघाडेचे तबलावादक. मुस्लीम समाजांत भुरगो जल्माक येतकच ताच्या कानांत कुराणांतली एक आयात गुणगुणटात. मात, अल्लारखाँ हांणी पुताच्या कानांत तबल्याची पढंत (बोल) गायली. बायलेन विचारलें तेन्ना तांणी सांगलें, तबल्याचे बोल हीच म्हजी आयात. तो चलो आशिल्लो झाकीर. फुडाराक सगल्या संवसाराक ताच्या तबल्याच्या बोलांनी मोनेळूच घालो. भारतीय शास्त्रीय संगीताचें आकर्शण विदेशीं लोकांक पयलीं सावन आशिल्लें. पूण पं. रवीशंकर आनी तांकां तबलासाथ करपी झाकीर हुसेनान अमेरिके सयत भोवतेक देशांनी आमचें संगीत तांच्या काळजा मेरेन पावयलें. वता थंय ते आनी तांचें संगीत गाजतालें. तबला वादन कलेक देशांतूच न्हय, तर विदेशांतूय मान, सन्मान दिवपाचें व्हडलें योगदान झाकीर हुसेन हांणी दिलां. पिरायेच्या तिसऱ्या वर्सा झाकीर हांणी तबल्याच्या शिक्षणाक सुरवात केली. गुरू तांचे बापूय अल्लारखाँ. मागीर उस्ताद लतीफ अहमद खान आनी उस्ताद विलायत हुसेन खान. पिरायेच्या बाराव्या वर्सा तांणी पयली वेवसायीक कार्यावळ केली. मानधन मेळ्ळें, 100 रुपया. मागीर तांणी फाटीं वळून पळयलें ना. जुंवानपणांत पावल दवरतनाच ते आंतरराष्ट्रीय कलाकार जाल्ले. पं. रवीशंकर हांकां लागून अमेरिकेक पावले. मार्क हॉर्ट, मॅक्लाॅफ्लिन अशा कलाकारां वांगडा तांणी केल्लें फ्यूजन संगीत गाजलें. भारतीय आनी विदेशी संगीताचो हो मिलाफ आशिल्लो. झाकीर हांचो शक्ती नांवाचो संगीत पंगडूय आशिल्लो. अंदूंच्या ग्रॅमी पुरस्कार सुवाळ्यांत झाकीर हांणी विक्रम केल्लो. एकाच बाराबर तीन ग्रॅमी जिखपी ते पयलेच भारतीय थारले. धीस मोमेंट ह्या अल्बमा खातीर ग्लोबल म्युझीक, पश्तो खातीर ग्लोबल म्युझीक पर्फोर्मन्स आनी एज वी स्पीक खातीर कंटेम्पोररी इन्स्ट्रूमेंटल अल्बम हे ते पुरस्कार. हाचे पयलींच तांकां 1992 आनी 2009 त ग्रॅमी पुरस्कार मेळिल्लो. ल्हान पिरायेचेर पद्मश्री, उपरांत पद्मभूषण आनी पद्मविभूषण किताब तांकां मेळ्ळ्यात.
तबल्याक ते आपलो भाव मानताले. ह्या वाद्यांत संगीताचे नोट्स आसात. म्हणटकच तातूंत रागूय आसपाक जाय, अशें ते म्हणटाले. सभावान सामके सादे. कलेचो गर्व तांणी केन्ना बाळगिलो ना. अहंकार वृत्ती तर तांचे मदीं मुळांतूच नाशिल्ली. व्हडलो तबलजी आसून हांव कोण तरी व्हडलो अशें तांणी केन्ना अप्रत्यक्ष रितीन पसून दाखोवंक ना. तबलापटू म्हूण ते म्हान आशिल्लेच, पूण मनीस म्हणूनय व्हड आशिल्ले. इश्ट पं. शिवकुमार शर्मा गेले तेन्ना तांणी तांच्या पार्थिवाक खांदो दिल्लो. ते अनंतात विलीन जातना शुन्य नदरेन चिता पळोवपी झाकीर हांचो फोटो तेन्ना खूब गाजिल्लो. झाकीर तबला वादनाचे खरेंच उस्ताद आशिल्ले. तांचो तबलो अक्षरशा उलयतालो म्हणल्यार जाता. ताचेर विविध प्रकारचे आवाजूय काडून दाखोवपाची तांकां कूय येताली. हरशी तबला वादन ही फकांडां करपाची कला न्हय. पूण शंख, रेलगाडी, पावसाचे थेंबे अशे आवाज काडून रसिकांक वाज येवचो ना, हाची जतनाय तांणी दरेके कार्यावळींत घेतली. मजा म्हणल्यार तांचें हें हटके तबलावादनूय गंभीर रसिकांनी पसून तकलेक घेतलें. गोंय कला अकादमींत तांची कार्यावळ आशिल्ली, तेन्ना भितर सरपाक वाट मेळनाशिल्ली. सुरश्री केसरबाई केरकार संगीत संमेलनातूय तांणी वादन केलां.
आयतारा सांजवेळा ते गेल्ल्याची खबर आयली. मागीर तांच्या भाच्यान ते जिवे आशिल्ल्याचें ट्विट केलें. पूण सोमारा उस्ताद झाकीर हुसेन खरेच गेले.
तबलो मोनो जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
